കാനഡയിലെ ക്യൂബെക്ക് പ്രവിശ്യയിൽ പുതിയതായി അധികാരത്തിലെത്തിയ സർക്കാർ, പ്രാഥമിക വിദ്യാലയങ്ങളിലെ വിദ്യാർത്ഥികൾ തലപ്പാവ്, നിഖാബ്, ഹിജാബ് തുടങ്ങിയ മതപരമായ മൂടുപടങ്ങളും ദൃശ്യമായ വിശ്വാസ ചിഹ്നങ്ങളും ധരിക്കുന്നത് പൂർണ്ണമായി നിരോധിക്കാൻ ഒരുങ്ങുന്നു. ഒക്ടോബറിലെ പ്രവിശ്യാ തിരഞ്ഞെടുപ്പിൽ വിജയിച്ച് അധികാരത്തിലെത്തിയ വിഘടനവാദി പാർട്ടിയായ ക്യൂബെക്കോയിസിന്റെ പ്രധാന തിരഞ്ഞെടുപ്പ് വാഗ്ദാനങ്ങളിൽ ഒന്നായിരുന്നു വിദ്യാർത്ഥികൾക്കുള്ള ഈ വസ്ത്രധാരണ നിയന്ത്രണം. തിരഞ്ഞെടുപ്പ് വാഗ്ദാനം യാതൊരു മാറ്റവുമില്ലാതെ നടപ്പിലാക്കുമെന്നും പ്രാഥമിക സ്കൂളുകളിൽ ഈ മതേതരത്വ നയം നടപ്പിലാക്കാൻ തങ്ങൾ പ്രതിജ്ഞാബദ്ധരാണെന്നും വിദ്യാഭ്യാസ മന്ത്രി ജോയൽ അർസെനോ വ്യക്തമാക്കി.
നേരത്തെ അധികാരത്തിലുണ്ടായിരുന്ന സിഎക്യു സർക്കാരിന്റെ കീഴിൽ അധ്യാപകർ, ഭരണഘടനാ ഉദ്യോഗസ്ഥർ തുടങ്ങി ചില പൊതുമേഖലാ ജീവനക്കാർക്കും, അതിനുശേഷം ഡേകെയറുകൾ, പൊതു ധനസഹായത്തോടെ പ്രവർത്തിക്കുന്ന സ്കൂളുകൾ എന്നിവയിലെ ജീവനക്കാർക്കും മതപരമായ ചിഹ്നങ്ങൾ വിലക്കിക്കൊണ്ട് നിയമം നടപ്പിലാക്കിയിരുന്നു. എന്നാൽ പുതിയ സർക്കാർ ഈ നിരോധനം വിദ്യാർത്ഥികളിലേക്ക് കൂടി വ്യാപിപ്പിക്കുന്നതോടെ വലിയ പ്രതിഷേധമാണ് പ്രവിശ്യയിൽ ഉയരുന്നത്. കനേഡിയൻ സിവിൽ ലിബർട്ടീസ് അസോസിയേഷനും ക്യൂബെക്കിലെ മുസ്ലീം കൗൺസിലും ഈ നീക്കത്തിനെതിരെ ശക്തമായി രംഗത്തെത്തിയിട്ടുണ്ട്. കൊച്ചുകുട്ടികളെ ലക്ഷ്യമിട്ടുള്ള ഈ തീരുമാനം സ്കൂളുകളും കുടുംബങ്ങളും തമ്മിലുള്ള ബന്ധം തകർക്കുമെന്നും, മതന്യൂനപക്ഷങ്ങളായ കുട്ടികളിൽ പാർശ്വവൽക്കരണവും രണ്ടാംതരം പൗരന്മാരാണെന്ന ചിന്തയും വളർത്തുമെന്നും വിവിധ മനുഷ്യാവകാശ സംഘടനകളും മതാധ്യക്ഷന്മാരും മുന്നറിയിപ്പ് നൽകുന്നു.