ഡൽഹി പൂർണ്ണമായും ഒരു പോലീസ് സ്റ്റേറ്റായി മാറിയെന്നും രാജ്യതലസ്ഥാനത്ത് ജനാധിപത്യവിരുദ്ധമായ നടപടികളാണ് നടക്കുന്നതെന്നും പ്രതിപക്ഷ നേതാവ് പിണറായി വിജയൻ. ചീഫ് ഇലക്ഷൻ കമ്മീഷണർ ഗ്യാനേഷ് കുമാറിനെതിരായ സമരത്തിൽ പങ്കെടുത്ത ശേഷം തിരുവനന്തപുരത്ത് തിരിച്ചെത്തി മാധ്യമങ്ങളോട് സംസാരിക്കുകയായിരുന്നു അദ്ദേഹം. പ്രതിഷേധിക്കാനുള്ള ജനങ്ങളുടെ അവകാശത്തെക്കുറിച്ച് സുപ്രീം കോടതി വ്യക്തമായി ഓർമ്മിപ്പിച്ചിട്ടും, കോടതിയുടെ വാക്കുകൾക്ക് വില കൽപ്പിക്കാൻ കേന്ദ്ര സർക്കാർ തയ്യാറായില്ലെന്ന് അദ്ദേഹം കുറ്റപ്പെടുത്തി. എല്ലായിടത്തും പോലീസും കേന്ദ്ര സേനയും നിറഞ്ഞിരിക്കുന്നതിനാൽ ജനങ്ങൾക്ക് സഞ്ചാര സ്വാതന്ത്ര്യം പോലും ലഭ്യമല്ലാത്ത സാഹചര്യമാണുള്ളത്.
ജന്തർ മന്തറിലേക്കുള്ള പ്രവേശനം തടഞ്ഞ കേന്ദ്ര നിലപാടിനെ ചോദ്യം ചെയ്ത് മുന്നോട്ട് പോയതായി അദ്ദേഹം വ്യക്തമാക്കി. എം.എ. ബേബി അടക്കമുള്ള നേതാക്കൾ കേരള ഹൗസിന് പുറത്തേക്ക് ഇറങ്ങിയ ഉടൻ തന്നെ പോലീസ് തടയുകയും ബലം പ്രയോഗിച്ച് അറസ്റ്റ് ചെയ്യുകയുമായിരുന്നു. കൊടും കുറ്റവാളികളെ കൊണ്ടുപോകുന്നതുപോലെയാണ് അറസ്റ്റ് ചെയ്തവരെ വാഹനങ്ങളിൽ കയറ്റിക്കൊണ്ടുപോയത്. തങ്ങളെ ബൊലേറോ ജീപ്പിൽ മണിക്കൂറുകളോളം എങ്ങോട്ടെന്നില്ലാതെ കറക്കിയ ശേഷമാണ് ഉച്ചയ്ക്ക് 2.30-ഓടെ മന്ദിർ മാർഗ് സ്റ്റേഷനിൽ എത്തിച്ചതെന്നും, അവിടെയെത്തിയ ശേഷമാണ് പോലീസുകാർ ഭക്ഷണം തന്നതെന്നും പിണറായി വിജയൻ വെളിപ്പെടുത്തി.