കൊച്ചി: പ്രമുഖ സ്മാര്‍ട്ട്‌ഫോണ്‍ നിര്‍മ്മാതാക്കളായ ഷവോമി ഇന്ത്യ, തങ്ങളുടെ പുതിയ സ്മാര്‍ട്ട്‌ഫോണായ റെഡ്മി 17സി 5ജിയുടെ വില്‍പ്പന ആരംഭിച്ചു. വലിയ സ്‌ക്രീന്‍, ദീര്‍ഘനേരം നിലനില്‍ക്കുന്ന ബാറ്ററി, വിശ്വസനീയമായ 5ജി പ്രവര്‍ത്തനം, പരിഷ്‌കരിച്ച രൂപകല്‍പ്പന എന്നിവ സമന്വയിപ്പിച്ചാണ് ഈ സ്മാര്‍ട്ട്‌ഫോണ്‍ പുറത്തിറക്കിയിരിക്കുന്നത്. 6.9 ഇഞ്ച് ഡിസ്പ്ലേയും 120 ഹെര്‍ട്‌സ് അഡാപ്റ്റീവ്സിങ്ക് പുതുക്കല്‍ നിരക്കും അടങ്ങിയ ഡിസ്പ്ലേ കാഴ്ചാനുഭവം കൂടുതല്‍ സുഗമമാക്കുന്നു. കണ്ണുകളുടെ സംരക്ഷണത്തിനായി ടിയുവി റൈന്‍ലാന്‍ഡ് സാക്ഷ്യപത്രവും ഇതിനുണ്ട്.
ദൈനംദിന ഉപയോഗങ്ങള്‍ക്കായി 6000 എംഎഎച്ച് ബാറ്ററിയും 33 വാട്ട് അതിവേഗ ചാര്‍ജിങ് സംവിധാനവുമാണ് ഫോണില്‍ ഉള്‍പ്പെടുത്തിയിരിക്കുന്നത്. സ്മാര്‍ട്ട് ചാര്‍ജിങ് സാങ്കേതികവിദ്യ ബാറ്ററിയുടെ ആയുസ്സ് വര്‍ധിപ്പിക്കുന്നു. മീഡിയടെക് ഡൈമെന്‍സിറ്റി 6300 മൊബൈല്‍ പ്ലാറ്റ്ഫോമില്‍ പ്രവര്‍ത്തിക്കുന്ന ഈ ഫോണില്‍ മെമ്മറി വികസന സൗകര്യത്തോടുകൂടിയ 12 ജിബി വരെ റാം പിന്തുണ ലഭിക്കും. 50 മെഗാപിക്‌സല്‍ കൃത്രിമബുദ്ധി അധിഷ്ഠിത ക്യാമറ, ഐപി64 പൊടിയും വെള്ളവും പ്രതിരോധിക്കുന്ന സംവിധാനം, വെറ്റ് ടച്ച് സാങ്കേതികവിദ്യ 2.0 എന്നിവയും ഇതിന്റെ പ്രത്യേകതകളാണ്.
ഷവോമി ഹൈപ്പര്‍ഒഎസ് 3 അധിഷ്ഠിതമായി പ്രവര്‍ത്തിക്കുന്ന ഈ ഫോണില്‍ ഗൂഗിള്‍ ജെമിനി, വൃത്തം വരച്ച് തിരയാനുള്ള സൗകര്യം, വശത്ത് ഘടിപ്പിച്ച വിരലടയാള സെന്‍സര്‍, 3.5 മില്ലിമീറ്റര്‍ ഹെഡ്ഫോണ്‍ ജാക്ക് എന്നിവ ലഭ്യമാണ്. 4 ജിബി റാം + 128 ജിബി സംഭരണ ശേഷിയുള്ള വകഭേദത്തിന് 20,999 രൂപയും, 6 ജിബി റാം + 128 ജിബി വകഭേദത്തിന് 22,999 രൂപയുമാണ് വില. ഈ ഫോണ്‍ എംഐ ഡാറ്റ് കോം, ആമസോണ്‍, ഷവോമി റീട്ടെയില്‍ കേന്ദ്രങ്ങള്‍ എന്നിവ വഴി വാങ്ങാവുന്നതാണ്.