കൊച്ചി: കൊച്ചി മെട്രോ രണ്ടാംഘട്ടമായ ‘പിങ്ക് ലൈനിന്റെ’ നിര്മാണ പ്രവര്ത്തനങ്ങള് പുരോഗമിക്കുന്നതായി കെഎംആര്എല്. ജവഹര്ലാല് നെഹ്റു സ്റ്റേഡിയത്തില് നിന്ന് കാക്കനാട് വഴി സ്മാര്ട് സിറ്റിയിലേക്കുള്ള 11.20 കിലോമീറ്റര് എലിവേറ്റഡ് പാതയുടെയും 11 സ്റ്റേഷനുകളുടെയും നിര്മാണമാണ് മുന്നേറുന്നത്. നിലവില് 24 മണിക്കൂറും സജീവമായി നടക്കുന്ന നിര്മാണത്തിലൂടെ പ്രതിദിനം 30 മുതല് 40 മീറ്റര് വരെ പാത പൂര്ത്തിയാകുന്നുണ്ട്.
ട്രാക്ക് വര്ക്ക്, സിഗ്നലിംഗ്, ടെലികമ്യൂണിക്കേഷന്, വൈദ്യുതി വിതരണം എന്നിവയ്ക്കുള്ള എല്ലാ കരാറുകളും നല്കി. ട്രാക്ക് നിര്മാണത്തിനാവശ്യമായ റെയിലുകള് കൊച്ചിയില് എത്തിക്കഴിഞ്ഞു. ലിഫ്റ്റ്, എസ്കലേറ്റര് മുതലായവയുടെ നിര്മാണ ജോലികള് ഫാക്ടറികളില് പുരോഗമിച്ചു കൊണ്ടിരിക്കുകയാണ്. സ്റ്റേഷനുകളുമായി ബന്ധപ്പെട്ട പൈലിംഗ്, പൈല് ക്യാപ് നിര്മാണം തുടങ്ങിയ എല്ലാ ഫൗണ്ടേഷന് ജോലികളും പൂര്ത്തിയായി.
പൈലിംഗ് ജോലികളുടെ 92 ശതമാനവും പൂര്ത്തിയായി. 2028 പൈലുകളില് 1877 എണ്ണവും 470 തൂണുകളില് 397 എണ്ണവും പൂര്ത്തിയാക്കി.266 പിയര് ക്യാപ്പുകളും സ്ഥാപിച്ചു കഴിഞ്ഞു. കൂടാതെ 346 യു ഗര്ഡറുകളും 136 ഐ ഗര്ഡറുകളും സ്ഥാപിച്ചതോടെ ഏകദേശം അഞ്ച് കിലോമീറ്ററോളം ദൂരം പാലം സജ്ജമായിട്ടുണ്ട്.