സ്ത്രീകൾക്ക് കെഎസ്ആർടിസി ഓർഡിനറി ബസുകളിൽ സൗജന്യ യാത്ര ഉറപ്പാക്കുന്ന സംസ്ഥാന സർക്കാരിന്റെ പ്രിയദർശിനി യാത്രാ പദ്ധതി നാളെ (സെപ്റ്റംബർ 22) നൂറ് ദിവസങ്ങൾ പിന്നിടുന്നു. സ്ത്രീകളുടെ യാത്രാച്ചെലവ് ലഘൂകരിക്കാനും പൊതുഗതാഗതത്തിലേക്ക് കൂടുതൽ സ്ത്രീകളെ ആകർഷിക്കാനുമായി 2026 ജൂൺ 15-നാണ് ഈ പദ്ധതിക്ക് തുടക്കം കുറിച്ചത്. ചുരുങ്ങിയ കാലയളവിനുള്ളിൽ തന്നെ സംസ്ഥാനത്തെ പൊതുഗതാഗത രംഗത്ത് വിപ്ലവകരമായ മാറ്റങ്ങൾ സൃഷ്ടിക്കാൻ ഈ പദ്ധതിക്ക് സാധിച്ചിട്ടുണ്ട്.
പദ്ധതി പ്രാബല്യത്തിൽ വന്നതോടെ കെഎസ്ആർടിസി ഓർഡിനറി ബസുകളെ ആശ്രയിക്കുന്ന സ്ത്രീകളുടെ എണ്ണത്തിൽ 60 ശതമാനത്തിന്റെ വൻ വർധനവാണ് രേഖപ്പെടുത്തിയിരിക്കുന്നത്. ജോലിസ്ഥലങ്ങളിലേക്കും വിദ്യാഭ്യാസ സ്ഥാപനങ്ങളിലേക്കും മറ്റ് അത്യാവശ്യ യാത്രകൾക്കും ദിവസേന കെഎസ്ആർടിസിയെ ആശ്രയിക്കുന്ന സ്ത്രീകൾക്ക് ഈ പദ്ധതി വലിയൊരു സാമ്പത്തിക ആശ്വാസമായി മാറി.
സുരക്ഷിതവും ചെലവുകുറഞ്ഞതുമായ യാത്ര ഉറപ്പാക്കുന്നതിലൂടെ സ്ത്രീകളുടെ സാമൂഹികവും സാമ്പത്തികവുമായ ശാക്തീകരണത്തിന് പ്രിയദർശിനി യാത്ര കരുത്തേകുന്നുണ്ട്. പദ്ധതിയുടെ നൂറാം ദിനത്തിൽ എത്തുമ്പോൾ, കെഎസ്ആർടിസിയുടെ സേവനങ്ങൾ കൂടുതൽ ജനസൗഹൃദമാക്കാനും ഒപ്പം സ്ത്രീ സൗഹൃദ പൊതുഗതാഗത സംവിധാനം ശക്തിപ്പെടുത്താനും കഴിഞ്ഞതിന്റെ സന്തോഷത്തിലാണ് കോർപ്പറേഷൻ.