<strong>ന്യൂഡല്ഹി</strong>: രാജ്യത്ത് സിഗരറ്റ് വില കുതിക്കുന്നു എന്ന് വിവരം. ഐടിസിയുടെ പ്രമുഖ ബ്രാന്ഡുകള്ക്ക് വീണ്ടും വില വര്ധനവെന്നാണ് വിവരം. ക്ലാസിക് കണക്ട് 20 സിഗററ്റുള്ള പാക്കറ്റിന് 38 രൂപയാണ് വര്ധിച്ചത്. ഇതോടെ ക്ലാസിക് കണക്ടിന്റെ വില 390 രൂപയില് നിന്ന് 428 രൂപ ആയി ഉയര്ന്നിട്ടുണ്ട്. ഗോള്ഡ് ഫ്ളേക്ക് സൂപ്പര് സ്റ്റാര് 10 സിഗററ്റുള്ള പാക്കറ്റിന് 10 രൂപ വര്ധിച്ചിട്ടുണ്ട്. ഇതോടെ ഗോള്ഡ് ഫ്ലേക്ക്സിന് 79 രൂപയില് നിന്ന് 89 ആയി വില ഉയര്ന്നു.തിരഞ്ഞെടുത്ത സിഗരറ്റ് ബ്രാന്ഡുകളുടെ പരമാവധി ചില്ലറ വില്പ്പന വിലയാണ് ഐടിസി വര്ദ്ധിപ്പിച്ചതെന്നാണ് ഡീലര്മാരില് നിന്നുള്ള വിവരം.
പുതുക്കിയ വില രേഖപ്പെടുത്തിയ സ്റ്റോക്കുകള് ഇതിനകം വിപണിയില് എത്തിത്തുടങ്ങിയിട്ടുണ്ട്. പുകയില നികുതിയിലുണ്ടായ മാറ്റങ്ങളെത്തുടര്ന്ന് സിഗരറ്റ് നിര്മ്മാതാക്കള് വില ക്രമീകരിക്കുന്നതിന്റെ ഭാഗമായി, ഈ വര്ഷം ഐടിസി പലതവണ വില വര്ദ്ധിപ്പിച്ചതിന് പിന്നാലെയാണ് പുതിയ വര്ദ്ധനവും ഉണ്ടായിരിക്കുന്നത്.ഫെബ്രുവരി ഒന്ന് മുതല് സിഗരറ്റുകളും മറ്റ് പുകയില ഉല്പ്പന്നങ്ങളും 40% ജിഎസ്ടി നിരക്കിന് കീഴിലായിട്ടുണ്ട്. ഇതിനൊപ്പം പുതിയൊരു അധിക എക്സൈസ് തീരുവ ഘടനയും നിലവില് വന്നു.
പുതിയ നികുതി വ്യവസ്ഥ പ്രകാരം, സിഗരറ്റുകളുടെ നീളവും ഫില്ട്ടര് ഉണ്ടോ എന്നതും അടിസ്ഥാനമാക്കി 1,000 എണ്ണത്തിന് 2,050 രൂപ മുതല് 8,500 രൂപ വരെ അധിക എക്സൈസ് തീരുവ ചുമത്തുന്നുണ്ട്. 40 ശതമാനം വരെ വരുന്ന ജിഎസ്ടിക്ക് പുറമെയാണ് ഈ അധിക തീരുവയും ഈടാക്കുന്നത്. ഇത് മൊത്തത്തിലുള്ള നികുതി ഭാരം വര്ദ്ധിപ്പിക്കുകയും തല്ഫലമായി എല്ലാ വിഭാഗം സിഗരറ്റുകളുടെയും ചില്ലറ വില്പ്പന വില ഉയരുകയും ചെയ്യുന്നു. ഉയര്ന്ന നികുതിച്ചെലവ് നിര്മ്മാതാക്കള് ഉപഭോക്താക്കളിലേക്ക് കൈമാറുന്നതിനാല്, നീളമേറിയതും ഫില്ട്ടര് ഉള്ളതുമായ സിഗരറ്റുകളുടെ വിലയിലാണ് ഏറ്റവും വലിയ വര്ദ്ധനവ് ഉണ്ടായിരിക്കുന്നത്.