ഐപിഎല്ലിൽ കൊൽക്കത്ത നൈറ്റ് റൈഡേഴ്സിന്റെ (കെ.കെ.ആർ) പുതിയ നായകനായി റിങ്കു സിംഗിനെ നിയമിക്കണമെന്ന് മുൻ ഇന്ത്യൻ താരം സുരേഷ് റെയ്ന. യു.പി ടി20 ലീഗിൽ മീററ്റ് മാവെറിക്സിനെ വിജയകരമായി നയിച്ച് ചാമ്പ്യന്മാരാക്കിയതിന് പിന്നാലെയാണ് റിങ്കുവിന്റെ നേതൃപാടവത്തെ പ്രശംസിച്ച് റെയ്ന രംഗത്തെത്തിയത്. ടൂർണമെന്റിൽ കളിച്ച 10 മത്സരങ്ങളിൽ 9 എണ്ണത്തിലും ടീമിനെ വിജയത്തിലേക്ക് നയിക്കാൻ റിങ്കുവിന് സാധിച്ചിരുന്നു.
യു.പി ടി20 ലീഗിന്റെ നാലാം സീസണിൽ മീററ്റ് ഫൈനലിൽ എത്തുമ്പോഴും കിരീടം നേടുമ്പോഴും റിങ്കുവിന്റെ നായകമികവ് നിർണായകമായിരുന്നു. നിലവിൽ കെ.കെ.ആർ പുതിയൊരു നായകനായുള്ള തിരച്ചിലിലാണെന്നും എന്നാൽ ടീമിന് അനുയോജ്യനായ ക്യാപ്റ്റനെ ഇതിനോടകം ലഭിച്ചുകഴിഞ്ഞുവെന്നാണ് തനിക്ക് തോന്നുന്നതെന്നും റെയ്ന അഭിപ്രായപ്പെട്ടു.
മുൻ ഇന്ത്യൻ താരം അജിങ്ക്യ രഹാനെ ക്രിക്കറ്റിന്റെ എല്ലാ ഫോർമാറ്റുകളിൽ നിന്നും വിരമിക്കൽ പ്രഖ്യാപിച്ചതിനെ തുടർന്നാണ് കൊൽക്കത്ത നൈറ്റ് റൈഡേഴ്സിന് പുതിയൊരു നായകനെ കണ്ടെത്തേണ്ട സാഹചര്യം ഉണ്ടായത്. കഴിഞ്ഞ ഐ.പി.എൽ സീസണിന് മുന്നോടിയായി കൊൽക്കത്തയുടെ വൈസ് ക്യാപ്റ്റനായി റിങ്കു സിംഗിനെ നിയമിച്ചിരുന്നു.