പ്രസ് മീറ്റിനിടെ നടി ഗൗരി കിഷനോട് മോശം ചോദ്യം ചോദിച്ച് വിവാദത്തിലായ യൂട്യൂബർ കാർത്തിക് പരസ്യമായി മാപ്പ് പറഞ്ഞു. നടിയെ അധിക്ഷേപിക്കാൻ ഉദ്ദേശിച്ചിട്ടില്ലെന്നും, അവർക്ക് മാനസിക പ്രയാസമുണ്ടാക്കിയതിൽ ഖേദിക്കുന്നുവെന്നും കാർത്തിക് വ്യക്തമാക്കി. ദുരുദ്ദേശത്തോടെയല്ല താൻ ആ ചോദ്യം ചോദിച്ചതെന്നും യൂട്യൂബർ കൂട്ടിച്ചേർത്തു.
സിനിമയുടെ പ്രസ് മീറ്റിനിടെ, യൂട്യൂബർ സിനിമയിലെ നായകനോട് “നടിയുടെ ഭാരം എത്രയാണ്?” എന്ന് ചോദിച്ചതാണ് വിവാദത്തിന് തിരികൊളുത്തിയത്. ഈ ചോദ്യത്തിൽ ക്ഷുഭിതയായ ഗൗരി കിഷൻ, സിനിമയെക്കുറിച്ചോ കഥാപാത്രത്തെക്കുറിച്ചോ ചോദിക്കാതെ വ്യക്തിപരമായ ചോദ്യം ചോദിക്കുന്നതിലെ അനൗചിത്യം തുറന്നടിച്ചു. തുടർന്ന് മറ്റ് മാധ്യമപ്രവർത്തകർ നടിക്കെതിരെ തിരിയുന്ന പ്രസ് മീറ്റിലെ വീഡിയോ സോഷ്യൽ മീഡിയയിൽ വൈറലായിരുന്നു.
ആദ്യ ഘട്ടത്തിൽ, താൻ തെറ്റായ ചോദ്യമൊന്നും ചോദിച്ചിട്ടില്ലെന്ന നിലപാടിലായിരുന്നു കാർത്തിക്. ഗൗരിയുടെ പ്രതികരണം പി.ആർ സ്റ്റണ്ട് ആണെന്നും, താൻ മാപ്പ് പറയില്ലെന്നും അദ്ദേഹം പ്രതികരിച്ചിരുന്നു. 32 വർഷത്തെ അനുഭവസമ്പത്തുള്ള മുതിർന്ന മാധ്യമപ്രവർത്തകനാണ് താനെന്നും, തമാശയ്ക്ക് വേണ്ടിയാണ് ചോദ്യം ചോദിച്ചതെന്നും കാർത്തിക് പറഞ്ഞിരുന്നു. മാർക്കറ്റ് വാല്യൂ കൂട്ടാനും പുതിയ സിനിമ ഓടാനും വേണ്ടിയാണ് നടി ഈ വിഷയത്തെ വലുതാക്കുന്നത് എന്നും അദ്ദേഹം ആരോപിച്ചിരുന്നു.
യൂട്യൂബറുടെ ചോദ്യത്തിനെതിരെ വലിയ വിമർശനമാണ് സിനിമാ മേഖലയിൽ നിന്നും സമൂഹമാധ്യമങ്ങളിൽ നിന്നും ഉയർന്നത്. സംവിധായകൻ പാ രഞ്ജിത്ത്, നടി ഖുശ്ബു സുന്ദർ, നടൻ കവിൻ, ഗായിക ചിന്മയി ശ്രീപദ തുടങ്ങിയ പ്രമുഖർ ഗൗരിക്ക് പിന്തുണയുമായി രംഗത്തെത്തി. മാന്യമല്ലാത്ത ചോദ്യങ്ങൾ തമിഴ് സിനിമാ ലോകം എത്ര പിന്നിലാണെന്നതിന്റെ തെളിവാണെന്ന് പാ രഞ്ജിത്ത് പ്രതികരിച്ചു.
തുടർന്ന് തന്നെ പിന്തുണച്ച എല്ലാവർക്കും ഗൗരി നന്ദി അറിയിച്ചു. വിഷമകരമായ ഒരു സാഹചര്യത്തിൽ ഉറച്ചുനിൽക്കാൻ കഴിഞ്ഞതിൽ സന്തോഷമുണ്ടെന്നും, അത് സമാന സാഹചര്യം നേരിടുന്നവർക്ക് വേണ്ടിയായിരുന്നു എന്നും ഗൗരി സോഷ്യൽ മീഡിയയിൽ കുറിച്ചു. തന്നോട് ചോദിച്ച അതേ ചോദ്യം അതേ രൂക്ഷമായ ഭാഷയിൽ ഒരു പുരുഷനോട് ചോദിക്കുമോ എന്നും ഗൗരി ചോദിച്ചിരുന്നു. ശക്തമായ വിമർശനങ്ങളെ തുടർന്നാണ് ഒടുവിൽ യൂട്യൂബർ കാർത്തിക് ഖേദം പ്രകടിപ്പിച്ച് മാപ്പ് പറയാൻ തയ്യാറായത്.