മുംബൈ: മഹാരാഷ്ട്രയിൽ കാലവർഷം അതിശക്തമായതോടെ തലസ്ഥാന നഗരമായ മുംബൈയും പരിസര പ്രദേശങ്ങളും പ്രളയ സമാനമായ അവസ്ഥയിലേക്ക്. വരും മണിക്കൂറുകളിൽ മുംബൈയിലും സബർബൻ മേഖലകളിലും കനത്ത നാശം വിതച്ച് അതിതീവ്ര മഴ പെയ്യാൻ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. ഇതിനെത്തുടർന്ന് നഗരത്തിൽ റെഡ് അലർട്ട് പ്രഖ്യാപിച്ചിരിക്കുകയാണ്. മണിക്കൂറിൽ 60 കിലോമീറ്റർ വരെ വേഗതയിൽ വീശിയടിച്ചേക്കാവുന്ന ശക്തമായ കാറ്റിനും സാധ്യതയുണ്ട്. കഴിഞ്ഞ ഏതാനും ദിവസങ്ങളായി തുടരുന്ന മഴക്കെടുതികളിൽ സംസ്ഥാനത്ത് ഇതുവരെ അഞ്ച് പേർ മരണപ്പെട്ടു.
ശനിയാഴ്ച രാവിലെ വരെയുള്ള 24 മണിക്കൂറിനുള്ളിൽ മുംബൈയുടെ വിവിധ ഭാഗങ്ങളിൽ 100 മില്ലിമീറ്ററിലധികം മഴയാണ് രേഖപ്പെടുത്തിയത്. ബാന്ദ്ര 150.6 mm, വിക്രോളി 143 mm, പരേൽ 141.8 mm മഴ ലഭിച്ചു. നഗരത്തിലെ ഭൂരിഭാഗം റോഡുകളും താഴ്ന്ന പ്രദേശങ്ങളും പൂർണ്ണമായി വെള്ളത്തിനടിയിലായി. മുംബൈയുടെ ജീവരേഖയായ ലോക്കൽ ട്രെയിനുകൾ പലതും മണിക്കൂറുകൾ വൈകിയാണ് സർവീസ് നടത്തുന്നത്. പൂനെ, താനെ എന്നീ നഗരങ്ങളിൽ കിലോമീറ്ററുകളോളം നീളുന്ന വലിയ ഗതാഗതക്കുരുക്കാണ് അനുഭവപ്പെടുന്നത്. ഉച്ചയ്ക്ക് ശേഷം കടലിൽ 4.26 മീറ്റർ ഉയരത്തിൽ ശക്തമായ വേലിയേറ്റത്തിന് സാധ്യതയുള്ളതിനാൽ തീരദേശവാസികളോട് മാറിത്താമസിക്കാൻ നിർദ്ദേശമുണ്ട്.
മഴയോടനുബന്ധിച്ചുണ്ടായ വിവിധ അപകടങ്ങളിൽ മുംബൈയിൽ മൂന്നും, പൂനെ, താനെ എന്നിവിടങ്ങളിൽ ഓരോ മരണം വീതവുമാണ് റിപ്പോർട്ട് ചെയ്തത്. ജൂൺ 30-ന് സ്കൂൾ ബസിന് മുകളിലേക്ക് മരം മറിഞ്ഞുവീണ് 11 വയസ്സുകാരൻ മരിച്ചു. സാകിനാക്കയിൽ ജോലിക്ക് നടന്നുപോവുകയായിരുന്ന 55-കാരൻ റോഡിലെ തുറന്ന മാൻഹോളിൽ വീണ് മരിച്ചു. ശുചീകരണത്തിനായി തുറന്നിട്ട മാൻഹോളിന് ചുറ്റും യാതൊരു മുന്നറിയിപ്പ് ബോർഡുകളും വെച്ചിരുന്നില്ലെന്ന് ആക്ഷേപമുണ്ട്. ശക്തമായ കാറ്റിൽ മരം ഒടിഞ്ഞുവീണ് ഒരാൾ മരണപ്പെട്ടു. ലോണി കൽഭോറിൽ ഓട നിർമ്മാണത്തിനായി കോൺട്രാക്ടർമാർ എടുത്തുവെച്ചതും മഴവെള്ളം നിറഞ്ഞതുമായ കുഴിയിൽ വീണ് രണ്ട് വയസ്സുകാരൻ മുങ്ങിമരിച്ചു.
റോഡിൽ വഴുതിവീണ 35-കാരി, സമീപത്തെ ട്രാൻസ്ഫോർമറിൽ നിന്നും വെള്ളത്തിലേക്ക് വൈദ്യുതി പ്രവഹിച്ച ലൈനിൽ തട്ടി ഷോക്കേറ്റ് മരിച്ചു. ഇതിനുപുറമെ നവി മുംബൈയിൽ റോഡിലെ വെള്ളക്കെട്ടിലൂടെ നടന്നുപോയ രണ്ട് കോളേജ് വിദ്യാർത്ഥികൾക്ക് ഭൂഗർഭ കേബിളിൽ നിന്ന് ഷോക്കേറ്റെങ്കിലും ഇവർ അത്ഭുതകരമായി രക്ഷപ്പെട്ടു. സംസ്ഥാനത്ത് വരും ദിവസങ്ങളിലും കനത്ത മഴ തുടരുമെന്നതിനാൽ ജനങ്ങൾ അനാവശ്യമായ യാത്രകൾ പൂർണ്ണമായും ഒഴിവാക്കണമെന്നും അധികൃതർ ആവശ്യപ്പെട്ടു.