നവംബർ മാസത്തിലേക്ക് കടക്കുമ്പോൾ സാധാരണക്കാരൻ്റെ സാമ്പത്തിക കാര്യങ്ങളിൽ സ്വാധീനം ചെലുത്തുന്ന ചെറുതല്ലാത്ത മാറ്റങ്ങളാണ് വരാനിരിക്കുന്നത്. ഈ മാറ്റങ്ങൾ ബാങ്ക് ഉപഭോക്താക്കൾ, ക്രെഡിറ്റ് കാർഡ് ഉടമകൾ, കേന്ദ്ര-സംസ്ഥാന സർക്കാർ ജീവനക്കാർ എന്നിവരെ നേരിട്ട് ബാധിക്കും. ബാങ്ക് അക്കൗണ്ടുകൾക്ക് ഒന്നിലധികം നോമിനേഷൻ അനുവദിക്കുന്നത് ഉൾപ്പെടെയുള്ള പ്രധാന മാറ്റങ്ങൾ വിശദമായി അറിയാം.
ബാങ്ക് അക്കൗണ്ടുകൾക്ക് 4 നോമിനികൾ വരെ
2025 നവംബർ 1 മുതൽ നിലവിൽ വരുന്ന പ്രധാന മാറ്റങ്ങളിലൊന്നാണിത്. നിക്ഷേപ അക്കൗണ്ടുകൾക്കും ബാങ്ക് ലോക്കറുകൾക്കും ഇനി നാല് നോമിനികളെ വരെ ചേർക്കാൻ സാധിക്കും. നാല് പേരെയും ഒരേസമയം നോമിനിയാക്കാനോ അല്ലെങ്കിൽ പിന്തുടർച്ചയുടെ ക്രമം വെക്കാനോ കഴിയും. അപ്രതീക്ഷിതമായി അക്കൗണ്ട് ഉടമക്ക് എന്തെങ്കിലും സംഭവിച്ചാൽ അവകാശികൾക്ക് ഫണ്ട് ക്ലെയിം ചെയ്യുന്നത് എളുപ്പമാക്കുന്നതിനാണ് ഈ ഭേദഗതി. 2025-ലെ ബാങ്കിംഗ് നിയമത്തിലെ വ്യവസ്ഥകൾ പ്രകാരമാണ് പുതിയ നിയമം വരുന്നത്.
എസ്‌ബി‌ഐ കാർഡ് ഫീസ് ഘടനയിൽ മാറ്റം
എസ്‌ബി‌ഐ ക്രെഡിറ്റ് കാർഡ് ഉപഭോക്താക്കൾക്ക് ചില ഇടപാടുകൾക്ക് നവംബർ മുതൽ പുതിയ നിരക്കുകൾ ബാധകമാകും. വിദ്യാഭ്യാസം സംബന്ധിച്ച പേയ്‌മെന്റുകൾ, വാലറ്റ് ലോഡുകൾ തുടങ്ങിയ തിരഞ്ഞെടുത്ത ഇടപാടുകൾക്കാണ് പുതിയ നിരക്കുകൾ വരുന്നത്. ക്രെഡ്, ചെക്ക്, മൊബിക്വിക് പോലുള്ള തേർഡ് പാർട്ടി ആപ്പുകൾ വഴി നടത്തുന്ന ഇത്തരം പേയ്മെന്റുകൾക്ക് ഇടപാട് തുകയുടെ 1% ഇനി ഫീസായി ഈടാക്കും. എന്നാൽ, സ്‌കൂളുകൾ, കോളേജുകൾ, സർവകലാശാലകൾ എന്നിവയുടെ ഔദ്യോഗിക വെബ്‌സൈറ്റുകൾ വഴിയോ ഓൺ-സൈറ്റ് പി‌ഒ‌എസ് മെഷീനുകൾ വഴിയോ നേരിട്ട് നടത്തുന്ന പേയ്മെന്റുകൾക്ക് ഈ ഫീസ് ഈടാക്കില്ല. കൂടാതെ, 1000 രൂപക്ക് മുകളിലുള്ള ഓരോ വാലറ്റ് ലോഡ് ഇടപാടിനും ഇടപാട് തുകയുടെ 1% ഈടാക്കും
പിഎൻബി ലോക്കർ ചാർജുകൾ കുറയ്ക്കും
പഞ്ചാബ് നാഷണൽ ബാങ്ക് (പിഎൻബി) വിവിധ ലോക്കർ വിഭാഗങ്ങൾക്കുള്ള ചാർജ് കുറച്ചു. 2025 ഒക്ടോബർ 16 ന് ബാങ്ക് പുറത്തിറക്കിയ അറിയിപ്പ് പ്രകാരം, ബാങ്കിൻ്റെ വെബ്‌സൈറ്റിൽ പ്രസിദ്ധീകരിച്ച് 30 ദിവസത്തിന് ശേഷം, അതായത് നവംബർ പകുതിയോടെ, പുതുക്കിയ നിരക്കുകൾ പ്രാബല്യത്തിൽ വരും. എല്ലാ പ്രദേശങ്ങളിലും ഇത് ബാധകമാണ്.
ലൈഫ് സർട്ടിഫിക്കറ്റ് (ജീവൻ പ്രമാൺ) സമർപ്പിക്കണം
എല്ലാ കേന്ദ്ര, സംസ്ഥാന സർക്കാർ പെൻഷൻകാരും അവരുടെ പ്രതിമാസ പെൻഷൻ തടസ്സമില്ലാതെ ലഭിക്കുന്നതിന് ലൈഫ് സർട്ടിഫിക്കറ്റ് (ജീവൻ പ്രമാൺ) സമർപ്പിക്കേണ്ടതുണ്ട്. 2025 നവംബർ 1 മുതൽ 2025 നവംബർ 30 വരെയുള്ള സമയമാണ് ഇതിനായി അനുവദിച്ചിരിക്കുന്നത്. പെൻഷനർ ജീവിച്ചിരിപ്പുണ്ടെന്നും പെൻഷൻ പേയ്മെന്റുകൾക്ക് ഇപ്പോഴും അർഹതയുണ്ടെന്നും തെളിയിക്കുന്നതിനാണ് ഇത് വർഷാവർഷം സമർപ്പിക്കുന്നത്. 80 വയസിനു മുകളിലുള്ളവർക്ക് ഒക്ടോബർ 1 മുതൽ സർട്ടിഫിക്കറ്റുകൾ സമർപ്പിക്കാൻ സമയം നൽകിയിരുന്നു.
യുപിഎസ് സമയപരിധി നീട്ടി
കേന്ദ്ര സർക്കാർ ജീവനക്കാർക്കുള്ള ദേശീയ പെൻഷൻ സംവിധാനത്തിൽ (എൻപിഎസ്) നിന്ന് ഏകീകൃത പെൻഷൻ പദ്ധതിയിലേക്ക് (യുപിഎസ്) മാറുന്നതിനുള്ള സമയപരിധി 2025 നവംബർ 30 വരെ നീട്ടി. യോഗ്യരായ നിലവിലുള്ള ജീവനക്കാർക്കും, നേരത്തെ വിരമിച്ചവർക്കും, എൻപിഎസിന് കീഴിൽ വരുന്ന വിരമിച്ചവരുടെ ജീവിത പങ്കാളികൾക്കും ഈ സമയപരിധി ബാധകമാണ്.
.