,സ്ത്രീകൾക്ക് കെഎസ്ആർടിസി ബസുകളിൽ സൗജന്യ യാത്ര അനുവദിച്ച സർക്കാർ തീരുമാനത്തിന് പിന്നാലെ, ഈ വിഷയത്തിൽ രൂക്ഷ പ്രതികരണവുമായി നടി പ്രിയങ്ക അനൂപ് രംഗത്ത്. ജൂൺ 15 മുതൽ ‘പ്രിയദർശിനി’ എന്ന് പേരിട്ട ഓർഡിനറി ബസുകളിലാണ് സ്ത്രീകൾക്ക് സൗജന്യ യാത്ര ലഭ്യമായത്. പദ്ധതിയെ സ്വാഗതം ചെയ്യുന്നവർക്കിടയിൽ പുരുഷന്മാർക്കും ഈ ആനുകൂല്യം നൽകണമെന്ന ആവശ്യം ശക്തമാകുന്നതിനിടെയാണ് നടിയുടെ അഭിപ്രായപ്രകടനം. “സ്ത്രീയും പുരുഷനും തുല്യരാണ്, അതുകൊണ്ട് പുരുഷന്മാർക്കും സൗജന്യ ബസ് യാത്ര നൽകണം,” എന്ന് പ്രിയങ്ക തുറന്നടിച്ചു. പദ്ധതി നടപ്പാക്കിയതിന് പിന്നാലെ പ്രൈവറ്റ് ബസുടമകൾ സമരം പ്രഖ്യാപിച്ചതും മറ്റും വലിയ പുകിലുകൾക്ക് വഴിവെച്ചിരിക്കുകയാണെന്നും നടി ചൂണ്ടിക്കാട്ടി.
തന്റെ അഭിപ്രായത്തിൽ, പ്രായമായവർക്കും ബുദ്ധിമുട്ടനുഭവിക്കുന്നവർക്കും സൗജന്യ സർവീസ് ലഭ്യമാക്കുകയാണ് വേണ്ടത്. നിലവിലെ സാഹചര്യത്തിൽ കെഎസ്ആർടിസിക്ക് നഷ്ടം വരാത്ത രീതിയിൽ കൂടുതൽ ബസുകൾ ഇതിനായി മാത്രമായി ഇറക്കുന്നതാണ് നല്ലതെന്നും പ്രിയങ്ക നിർദ്ദേശിച്ചു. മുഖ്യമന്ത്രിയോട് പുരുഷന്മാർക്കും സൗജന്യം അനുവദിക്കണമെന്ന് ആവശ്യപ്പെടാൻ താൻ തയ്യാറാണെന്നും, അതിൽ എന്താണ് തെറ്റെന്നും അവർ ചോദിക്കുന്നു. മാത്രമല്ല, കഷ്ടപ്പെട്ട് പഠിക്കാൻ പോകുന്ന വിദ്യാർഥികൾക്കും ഈ സൗജന്യം ബാധകമാക്കണമെന്ന് നടി ആവശ്യപ്പെട്ടു. സർക്കാർ അധികാരത്തിൽ വന്ന് ഒരു മാസം മാത്രമേ ആയിട്ടുള്ളൂവെന്നും, എല്ലാം ഒറ്റയടിക്ക് നടപ്പിലാക്കാൻ സാധിക്കില്ലെന്നും മനസ്സിലാക്കുന്നു. എങ്കിലും ഓരോ കാര്യങ്ങളായി സർക്കാർ ചെയ്തു വരുമെന്ന പ്രതീക്ഷയും അവർ പങ്കുവെച്ചു.