സ്കോഡതങ്ങളുടെ ഏറ്റവും ചെറുതും താങ്ങാനാവുന്നതുമായ പുതിയ ഇലക്ട്രിക് എസ്യുവി ‘എപിക്’ എന്ന മോഡലിന്റെ പ്രൊഡക്ഷൻ-സ്പെക്ക് പതിപ്പ് പുറത്തിറക്കി. കമ്പനിയുടെ പുത്തൻ ഡിസൈൻ ശൈലിയിൽ ഒരുങ്ങിയിരിക്കുന്ന ഈ വാഹനത്തിന് കറുത്ത ഗ്രില്ലും, അതിന് ഇരുവശത്തുമായി സ്ലിം ഡിആർഎല്ലുകളും, എൽ-ആകൃതിയിലുള്ള ഹെഡ്ലൈറ്റുകളുമാണുള്ളത്. 8 സ്ലാറ്റുകളുള്ള കട്ടിയുള്ള ബമ്പറും സിൽവർ സ്കിഡ് പ്ലേറ്റും ഇതിന്റെ മുൻഭാഗത്തിന് കരുത്തുറ്റ ലുക്ക് നൽകുന്നു. വശങ്ങളിൽ 17 മുതൽ 19 ഇഞ്ച് വരെയുള്ള അലോയ് വീലുകൾ, കറുത്ത റൂഫ് റെയിലുകൾ എന്നിവയും, പിൻഭാഗത്ത് ടി-ആകൃതിയിലുള്ള എൽഇഡി ടെയിൽലാമ്പുകളും വലിയൊരു റൂഫ് സ്പോയിലറും നൽകിയിട്ടുണ്ട്. 4,171 മില്ലീമീറ്റർ നീളമുള്ള ഈ എസ്യുവിയിൽ 475 ലിറ്റർ ബൂട്ട് സ്പേസും, മുൻവശത്ത് 25 ലിറ്റർ ഫ്രണ്ട് ട്രങ്കും ഒരുക്കിയിരിക്കുന്നു.
ഗ്രേ, മിന്റ് ഗ്രീൻ, ബ്രൗൺ എന്നീ ആകർഷകമായ കളർ ഓപ്ഷനുകളിലാണ് എപ്പിക്കിന്റെ ഇന്റീരിയർ ലഭ്യമാകുക. ഡാഷ്ബോർഡിൽ 13 ഇഞ്ച് ആൻഡ്രോയിഡ് അധിഷ്ഠിത ഇൻഫോടെയ്ൻമെന്റ് ടച്ച്സ്ക്രീൻ, രണ്ട് സ്പോക്ക് സ്റ്റിയറിംഗ് വീൽ, ചെറിയൊരു ഡിജിറ്റൽ ഡ്രൈവർ ഡിസ്പ്ലേ എന്നിവ ഉൾപ്പെടുത്തിയിട്ടുണ്ട്. ഫ്ലോട്ടിംഗ് സെന്റർ കൺസോൾ, ആംബിയന്റ് ലൈറ്റിംഗ് എന്നിവയ്ക്കൊപ്പം വയർലെസ് ആപ്പിൾ കാർപ്ലേ, ആൻഡ്രോയിഡ് ഓട്ടോ, പനോരമിക് സൺറൂഫ്, വയർലെസ് ചാർജിംഗ് പാഡ്, 10-സ്പീക്കർ കാന്റൺ സൗണ്ട് സിസ്റ്റം എന്നിവയും ഇതിലുണ്ട്. സുരക്ഷയ്ക്കായി ഏഴ് എയർബാഗുകൾ, 360-ഡിഗ്രി ക്യാമറ, എഡിഎഎസ് സ്യൂട്ട് എന്നിവയും ഇതിൽ സജ്ജീകരിച്ചിരിക്കുന്നു. കൂടാതെ മറ്റ് ഉപകരണങ്ങളിലേക്ക് പവർ പങ്കിടാൻ സഹായിക്കുന്ന V2L, V2V ഫംഗ്ഷണാലിറ്റികളും ഇതിലുണ്ട്.
ഫോക്സ്വാഗണിന്റെ MEB+ പ്ലാറ്റ്ഫോമിൽ നിർമ്മിച്ച എപിക് 35, 40, 55 എന്നീ മൂന്ന് വേരിയന്റുകളിൽ ലഭ്യമാകും. ഇതിൽ 38.5kWh, 55kWh എന്നിങ്ങനെ രണ്ട് ബാറ്ററി ഓപ്ഷനുകളാണുള്ളത്. 38.5kWh ബാറ്ററി ഉപയോഗിക്കുന്ന 35, 40 വേരിയന്റുകൾ യഥാക്രമം 116hp, 135hp കരുത്തും 267Nm ടോർക്കും ഉത്പാദിപ്പിക്കുന്നു; ഇത് ഒറ്റ ചാർജിൽ 310 കി.മീ റേഞ്ച് നൽകും. എന്നാൽ ഏറ്റവും ഉയർന്ന പതിപ്പായ ‘എപിക് 55’ വേരിയന്റിലെ 55kWh ബാറ്ററി 211hp പവറും 290Nm ടോർക്കും നൽകുന്നതോടൊപ്പം, 440 കിലോമീറ്റർ വരെയുള്ള മികച്ച റേഞ്ചും വാഗ്ദാനം ചെയ്യുന്നു. ഡിസി ഫാസ്റ്റ് ചാർജിംഗ് സാങ്കേതികവിദ്യയുടെ സഹായത്തോടെ വലിയ ബാറ്ററി വെറും 24 മിനിറ്റുകൊണ്ട് 10-ൽ നിന്നും 80 ശതമാനം വരെ ചാർജ് ചെയ്യാൻ സാധിക്കുമെന്നതാണ് ഇതിന്റെ പ്രധാന സവിശേഷത.