ഇന്ത്യയും സ്വീഡനും തമ്മിലുള്ള ഉഭയകക്ഷി ബന്ധം ഇനി മുതൽ തന്ത്രപരമായ പങ്കാളിത്തത്തിന്റെ തലത്തിലേക്ക് ഉയരുന്നു. സ്വീഡൻ സന്ദർശനത്തിനിടെ പ്രധാനമന്ത്രി നരേന്ദ്ര മോദിയും സ്വീഡിഷ് പ്രധാനമന്ത്രി ഉൾഫ് ക്രിസ്റ്റേഴ്സണും ഗോഥെൻബർഗിൽ നടത്തിയ വിപുലമായ ഉഭയകക്ഷി ചർച്ചയിലാണ് ഇരുരാജ്യങ്ങളും തമ്മിൽ ഈ നിർണായക ധാരണയിലെത്തിയത്. യൂറോപ്യൻ റൗണ്ട് ടേബിൾ ഫോർ ഇൻഡസ്ട്രിയെ അഭിസംബോധന ചെയ്ത പ്രധാനമന്ത്രി, സ്വീഡനുമായും യൂറോപ്പുമായും ഇന്ത്യ കെട്ടിപ്പടുക്കുന്ന ശക്തമായ തന്ത്രപരവും സാമ്പത്തികവുമായ ഇടപെടലുകൾക്ക് അടിവരയിട്ടു.
ഉഭയകക്ഷി ബന്ധങ്ങൾ മെച്ചപ്പെടുത്തുന്നതിൽ നൽകിയ അസാധാരണ സംഭാവനകളും ദീർഘവീക്ഷണമുള്ള നേതൃത്വവും മുൻനിർത്തി സ്വീഡന്റെ പരമോന്നത ബഹുമതിയായ ‘റോയൽ ഓർഡർ ഓഫ് ദി പോളാർ സ്റ്റാർ, ഡിഗ്രി കമാൻഡർ ഗ്രാൻഡ് ക്രോസ്’ പ്രധാനമന്ത്രി നരേന്ദ്ര മോദിക്ക് സമ്മാനിച്ചു. സ്വീഡനിലെ കിരീടാവകാശി വിക്ടോറിയയും പങ്കെടുത്ത ഉഭയകക്ഷി യോഗത്തിൽ, രാജാവ് കാൾ പതിനാറാമൻ ഗുസ്താഫിന്റെയും രാജ്ഞി സിൽവിയയുടെയും ഊഷ്മളമായ ആശംസകൾ അവർ പ്രധാനമന്ത്രിയെ അറിയിച്ചു. എൺപതാം ജന്മദിനത്തിലെത്തിയ സ്വീഡിഷ് രാജാവിന് പ്രധാനമന്ത്രി മോദി വേദിയിൽ വെച്ച് ജന്മദിനാശംസകൾ നേരുകയും ചെയ്തു.
പരസ്പരമുള്ള നവീകരിച്ച തന്ത്രപരമായ പങ്കാളിത്തം കൂടുതൽ സജീവമാക്കുന്നതിനായി 2026-2030 കാലയളവിലേക്കുള്ള ഇന്ത്യ-സ്വീഡൻ സംയുക്ത കർമ്മ പദ്ധതി ഇരു നേതാക്കളും ചേർന്ന് അംഗീകരിച്ചു. രാഷ്ട്രീയ, സാമ്പത്തിക, സാങ്കേതിക, സുരക്ഷാ, കാലാവസ്ഥാ മേഖലകളിലും ജനങ്ങൾ തമ്മിലുള്ള ബന്ധത്തിലും ശക്തമായ സഹകരണത്തിനുള്ള രൂപരേഖയാണ് ഇതിലൂടെ തയ്യാറാക്കിയിരിക്കുന്നത്. സ്ഥിരതയ്ക്കും സുരക്ഷയ്ക്കും വേണ്ടിയുള്ള സംഭാഷണം, അടുത്ത തലമുറ സാമ്പത്തിക പങ്കാളിത്തം, ഉയർന്നുവരുന്ന സാങ്കേതികവിദ്യകൾ, ആളുകളുടെയും ഭൂമിയുടെയും ആരോഗ്യം ഉറപ്പാക്കൽ തുടങ്ങിയ നാല് പ്രധാന തൂണുകളിലാണ് ഈ പങ്കാളിത്തം കെട്ടിപ്പടുത്തിരിക്കുന്നത്.
വ്യാപാരം, നിക്ഷേപം, നവീകരണം, ഹരിത പരിവർത്തനം, ബഹിരാകാശം, ഗവേഷണം, വിദ്യാഭ്യാസം എന്നിവയുൾപ്പെടെ ഇരുരാജ്യങ്ങളും തമ്മിലുള്ള ബന്ധത്തിന്റെ മുഴുവൻ മേഖലകളും യോഗത്തിൽ അവലോകനം ചെയ്തു. പ്രതിരോധവും സുരക്ഷയും ഡിജിറ്റലൈസേഷനും ശക്തിപ്പെടുത്തുന്നതിനൊപ്പം ചെറുകിട ഇടത്തരം സംരംഭങ്ങളുടെ വളർച്ചയ്ക്കും സംയുക്ത പദ്ധതിയിലൂടെ കൂടുതൽ വേഗത കൈവരുമെന്ന് ഇരു നേതാക്കളും പ്രത്യാശ പ്രകടിപ്പിച്ചു.