തിരുവനന്തപുരം: നീണ്ട അനിശ്ചിതത്വങ്ങൾക്കും ഉഭയകക്ഷി ചർച്ചകൾക്കുമൊടുവിൽ പുതിയ യു.ഡി.എഫ് മന്ത്രിസഭയുടെ അന്തിമ പട്ടിക തയാറായി. നിയുക്ത മുഖ്യമന്ത്രി വി.ഡി. സതീശൻ രാജ്ഭവനിലെത്തി ഗവർണർക്ക് 20 മന്ത്രിമാരുടെ പട്ടിക കൈമാറി. മുഖ്യമന്ത്രി ഉൾപ്പെടെ ആകെ 21 അംഗങ്ങളുള്ള സമ്പൂർണ്ണ മന്ത്രിസഭയാണ് മെയ് 18 തിങ്കളാഴ്ച അധികാരമേൽക്കുന്നത്. മുതിർന്ന കോൺഗ്രസ് നേതാവ് തിരുവഞ്ചൂർ രാധാകൃഷ്ണൻ പുതിയ നിയമസഭാ സ്പീക്കറാകും.
വ്യാപകമായ കൂടിയാലോചനകൾക്ക് ശേഷമാണ് മന്ത്രിമാരുടെ അന്തിമ പട്ടികയ്ക്ക് രൂപം നൽകിയതെന്ന് വി.ഡി. സതീശൻ വ്യക്തമാക്കി. എന്നാൽ, അർഹതയുള്ള പലരും മന്ത്രിസഭയ്ക്ക് പുറത്തുണ്ടെന്ന യാഥാർഥ്യം അദ്ദേഹം തുറന്നുസമ്മതിച്ചു. മുന്നണിയിലെ ഘടകകക്ഷികളുമായുള്ള കൃത്യമായ വിഭജനവും പ്രാതിനിധ്യവും ഉറപ്പാക്കിയാണ് പുതിയ ടീമിനെ പ്രഖ്യാപിച്ചിരിക്കുന്നത്. വകുപ്പ് വിഭജനം സംബന്ധിച്ച ഔദ്യോഗിക പ്രഖ്യാപനം ഉടൻ ഉണ്ടാകും.