തമിഴ്നാട് നിയമസഭാ തിരഞ്ഞെടുപ്പ് പുരോഗമിക്കവെ സൂപ്പർതാരങ്ങളായ വിജയ്, തൃഷ എന്നിവർ വിവിധ പോളിംഗ് ബൂത്തുകളിൽ വോട്ട് രേഖപ്പെടുത്തി. ചെന്നൈ നീലങ്കരൈയിലെ പോളിംഗ് ബൂത്തിൽ രാവിലെ എത്തിയ വിജയ്, ക്യൂവിൽ നിന്ന് വോട്ട് ചെയ്തപ്പോൾ ആരാധകരും അനുയായികളും ആവേശകരമായ സ്വീകരണമാണ് നൽകിയത്. അതേസമയം, ആരാധകരുടെ പ്രതീക്ഷകൾക്ക് വിരുദ്ധമായി ചെന്നൈ ആൽവാർപേട്ടിലെ ബൂത്തിലാണ് തൃഷ വോട്ട് രേഖപ്പെടുത്തിയത്. ഇരുവരും ഒരേ ബൂത്തിലാണോ വോട്ട് ചെയ്യുക എന്ന് ആരാധകർ ഉറ്റുനോക്കിയിരുന്നുവെങ്കിലും പത്ത് കിലോമീറ്റർ അകലെയുള്ള വെവ്വേറെ കേന്ദ്രങ്ങളിലാണ് താരങ്ങൾ എത്തിയത്.
അടുത്തിടെ ഒരു വിവാഹ ചടങ്ങിൽ വിജയും തൃഷയും ഒരുമിച്ച് പങ്കെടുത്ത ചിത്രങ്ങൾ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരുന്നു. വ്യക്തിപരമായ ജീവിതത്തിലെ വാർത്തകൾക്കിടയിലും ഇരുവരും പൊതുവേദിയിൽ ഒരുമിച്ച് പ്രത്യക്ഷപ്പെട്ടത് സിനിമാ-രാഷ്ട്രീയ വൃത്തങ്ങളിൽ ഒരുപോലെ ശ്രദ്ധിക്കപ്പെട്ടു. വോട്ട് രേഖപ്പെടുത്താൻ എത്തിയപ്പോഴും തൃഷയെയും വിജയ്യെയും കാണാൻ വൻ ജനക്കൂട്ടമാണ് തടിച്ചുകൂടിയത്. അജിത്ത്, രജനീകാന്ത് തുടങ്ങിയ പ്രമുഖ താരങ്ങളും രാവിലെ തന്നെ വോട്ട് രേഖപ്പെടുത്തി മടങ്ങി.