ഐപിഎല്ലിൽ തുടർച്ചയായ തോൽവികൾ നേരിടുന്ന ചെന്നൈ സൂപ്പർ കിംഗ്സിന്റെ പതനത്തിന് കാരണം മലയാളി താരം സഞ്ജു സാംസണിന്റെ ഫോമില്ലായ്മയല്ലെന്ന് മുൻ ഇന്ത്യൻ താരം ഇർഫാൻ പത്താൻ. റോയൽ ചലഞ്ചേഴ്സ് ബെംഗളൂരുവിനോട് 43 റൺസിന് തോറ്റതിന് പിന്നാലെയാണ് ടീമിന്റെ ബൗളിംഗ് നിരയിലെ പോരായ്മകൾ ചൂണ്ടിക്കാട്ടി പത്താൻ രംഗത്തെത്തിയത്.
ചെന്നൈക്കായി കളിച്ച ആദ്യ മൂന്ന് മത്സരങ്ങളിലും സഞ്ജു സാംസണ് തിളങ്ങാനായിരുന്നില്ല (6, 7, 9 എന്നിങ്ങനെയാണ് സ്കോറുകൾ). എന്നാൽ സഞ്ജുവല്ല, മറിച്ച് അഫ്ഗാൻ സ്പിന്നർ നൂർ അഹമ്മദിന്റെ മോശം ഫോമാണ് ടീമിന് തിരിച്ചടിയാകുന്നതെന്ന് പത്താൻ നിരീക്ഷിക്കുന്നു. കഴിഞ്ഞ സീസണിലെ മികച്ച പ്രകടനം ആവർത്തിക്കാൻ നൂറിന് കഴിയുന്നില്ല. ഈ സീസണിൽ എറിഞ്ഞ 10 ഓവറിൽ ഒന്നിൽ പോലും വിക്കറ്റ് നേടാൻ നൂറിന് കഴിഞ്ഞില്ലെന്ന് മാത്രമല്ല, 11-ന് മുകളിൽ ഇക്കോണമി റേറ്റിൽ താരം റൺസ് വഴങ്ങുകയും ചെയ്തു. നൂറിന്റെ റണ്ണപ്പിലെ പിഴവുകളാണ് പന്തിന്റെ ദിശ തെറ്റിക്കുന്നതെന്ന് പത്താൻ തന്റെ യൂട്യൂബ് ചാനലിലൂടെ വ്യക്തമാക്കി.
മറ്റ് ബൗളർമാർക്കും വിമർശനം
നൂറിനെ കൂടാതെ ന്യൂസിലൻഡ് പേസർ മാറ്റ് ഹെൻറിയുടെ പ്രകടനത്തെയും പത്താൻ വിമർശിച്ചു. വിരാട് കോഹ്ലി ക്രീസിന് പുറത്തേക്ക് ഇറങ്ങി വരുന്നത് കണ്ടിട്ടും ‘ഹാഫ് വോളി’ എറിഞ്ഞ ഹെൻറിയുടെ നടപടി വലിയ പിഴവാണെന്ന് അദ്ദേഹം പറഞ്ഞു. കൂടാതെ അൻഷുൽ കാംബോജ്, ജാമി ഓവർടൺ എന്നിവർ ടിം ഡേവിഡിനെതിരെ പന്തെറിഞ്ഞ രീതിയെയും പത്താൻ ചോദ്യം ചെയ്തു. കൃത്യമായ പ്ലാനിംഗില്ലാത്ത ബൗളിംഗ് ചെന്നൈയുടെ പരാജയത്തിന്റെ ആക്കം കൂട്ടുന്നു.
സഞ്ജുവിന്റെ ബാറ്റിംഗ് ഫോമിനെക്കാൾ ചെന്നൈ ഭയപ്പെടേണ്ടത് ബൗളിംഗ് നിരയിലെ ഈ പാളിച്ചകളെയാണെന്ന് പത്താൻ അടിവരയിട്ടു പറയുന്നു. നിലവിൽ കളിച്ച മൂന്ന് മത്സരങ്ങളും തോറ്റ ചെന്നൈ സൂപ്പർ കിംഗ്സ് പോയിന്റ് പട്ടികയിൽ അവസാന സ്ഥാനത്താണ്.