വിജയ് ഹസാരെ ട്രോഫി ഏകദിന ക്രിക്കറ്റ് ടൂർണമെന്റിന്റെ കലാശപ്പോരാട്ടത്തിൽ നാളെ വിദർഭയും സൗരാഷ്ട്രയും നേർക്കുനേർ വരും. രണ്ടാം സെമി ഫൈനലിൽ പഞ്ചാബ് ഉയർത്തിയ 292 റൺസ് എന്ന വെല്ലുവിളി ഉയർത്തിയ സ്കോർ ഒരു വിക്കറ്റ് മാത്രം നഷ്ടത്തിൽ മറികടന്നാണ് സൗരാഷ്ട്ര ഫൈനലിലേക്ക് ടിക്കറ്റെടുത്തത്. 127 പന്തിൽ നിന്ന് പുറത്താകാതെ 165 റൺസ് നേടിയ വിശ്വരാജ് ജഡേജയുടെ വെടിക്കെട്ട് ഇന്നിങ്സാണ് സൗരാഷ്ട്രയ്ക്ക് അനായാസ വിജയം സമ്മാനിച്ചത്. നേരത്തെ സെഞ്ച്വറി നേടിയ അൻമോൽപ്രീത് സിങ്ങിന്റെയും 87 റൺസെടുത്ത ക്യാപ്റ്റൻ പ്രഭ്സിംറാൻ സിങ്ങിന്റെയും മികവിലാണ് പഞ്ചാബ് പൊരുതാവുന്ന സ്കോർ പടുത്തുയർത്തിയത്.
നിലവിലെ ചാമ്പ്യന്മാരായ കർണാടകയെ തകർത്തു കൊണ്ടാണ് വിദർഭ ഫൈനലിലെത്തിയത്. ഇത് തുടർച്ചയായ രണ്ടാം തവണയാണ് വിദർഭ ഫൈനലിൽ പ്രവേശിക്കുന്നത്. കഴിഞ്ഞ വർഷം ഫൈനലിൽ കർണാടകയോട് തോറ്റ് കിരീടം കൈവിട്ടതിന്റെ ക്ഷീണം തീർക്കുക എന്ന ലക്ഷ്യത്തോടെയാകും വിദർഭ നാളെ കളത്തിലിറങ്ങുക. സ്ഥിരതയാർന്ന പ്രകടനം നടത്തുന്ന ഇരു ടീമുകളും ഏറ്റുമുട്ടുമ്പോൾ ഒരു ആവേശപ്പോരാട്ടമാണ് ആരാധകർ പ്രതീക്ഷിക്കുന്നത്.