ചെലവ് ചുരുക്കൽ നടപടികളുടെ ഭാഗമായി കോർപ്പറേറ്റ് തലത്തിലുള്ള 30,000 ജീവനക്കാരെ പിരിച്ചുവിടാൻ ആമസോൺ ഒരുങ്ങുന്നു. ഇത് ആമസോണിൻ്റെ ചരിത്രത്തിലെ, 2022 അവസാനത്തിൽ ഏകദേശം 27,000 തസ്തികകൾ വെട്ടിക്കുറച്ചതിന് ശേഷമുള്ള, ഏറ്റവും വലിയ കൂട്ടപ്പിരിച്ചുവിടലാണ്. ഈ തീരുമാനം സംബന്ധിച്ച ഇമെയിലുകൾ ജീവനക്കാർക്ക് ചൊവ്വാഴ്ച മുതൽ ലഭിച്ചുതുടങ്ങും.
ആമസോണിൻ്റെ ആകെ ജീവനക്കാരുടെ എണ്ണം 1.55 ദശലക്ഷമാണ്. പിരിച്ചുവിടുന്ന 30,000 എന്നത് മൊത്തം ജീവനക്കാരുടെ ചെറിയൊരു ശതമാനം മാത്രമാണെങ്കിലും, ആമസോണിലെ കോർപ്പറേറ്റ് തൊഴിലാളികളുടെ പത്ത് ശതമാനത്തോളം പേരെ ഇത് നേരിട്ട് ബാധിക്കും.
കൊറോണ വൈറസ് മഹാമാരിയുടെ സമയത്ത് ഇ-കൊമേഴ്‌സ് ആവശ്യകത വർദ്ധിച്ചതിനെ തുടർന്ന് നടത്തിയ അധിക നിയമനങ്ങൾ കുറയ്ക്കുക എന്നതാണ് പ്രധാന ലക്ഷ്യം. സാമ്പത്തിക മാന്ദ്യത്തിൻ്റെ പശ്ചാത്തലത്തിൽ കമ്പനിയുടെ പ്രവർത്തനച്ചെലവ് കുറയ്ക്കുന്നതിൻ്റെ ഭാഗമായാണ് ഈ നടപടി. ആവർത്തന സ്വഭാവമുള്ള സാധാരണ ജോലികൾ ഓട്ടോമേറ്റ് ചെയ്യുന്നതിന് ആർട്ടിഫിഷ്യൽ ഇൻ്റലിജൻസ് കൂടുതൽ ഉപയോഗിക്കാൻ കഴിയുമെന്ന് ആമസോൺ തിരിച്ചറിഞ്ഞതിൻ്റെ സൂചനയാണിതെന്ന് സാമ്പത്തിക വിദഗ്ധർ വിലയിരുത്തുന്നു. ജീവനക്കാർ ആഴ്ചയിൽ അഞ്ച് ദിവസം ഓഫീസിൽ ഹാജരാകണമെന്ന ടെക് മേഖലയിലെ കർശനമായ നയം നടപ്പിലാക്കിയെങ്കിലും, ഇത് പ്രതീക്ഷിച്ചത്ര തൊഴിലാളികളെ കമ്പനിയിൽ നിന്ന് സ്വയം കൊഴിഞ്ഞുപോകുന്നതിന് കാരണമാകാത്തതും പിരിച്ചുവിടലിന് ഒരു കാരണമായി ചൂണ്ടിക്കാട്ടുന്നുണ്ട്.
പീപ്പിൾ എക്‌സ്പീരിയൻസ് ആൻഡ് ടെക്‌നോളജി എന്നറിയപ്പെടുന്ന ഹ്യൂമൻ റിസോഴ്‌സസ്, ഓപ്പറേഷൻസ്, ഡിവൈസസ് ആൻഡ് സർവീസസ്, കൂടാതെ കമ്പനിയുടെ ഏറ്റവും വലിയ ലാഭകേന്ദ്രമായ ആമസോൺ വെബ് സർവീസസ് എന്നിവയുൾപ്പെടെ വിവിധ ഡിവിഷനുകളിലെ ജോലികളെ ഈ തീരുമാനം ബാധിച്ചേക്കാം. നേരത്തെ, ഹ്യുമൺ റിസോഴ്‌സ് വിഭാഗത്തിൽ മാത്രം 15 ശതമാനം തൊഴിൽ നഷ്ടമുണ്ടാകുമെന്ന് റിപ്പോർട്ടുകൾ ഉണ്ടായിരുന്നു.
ആമസോൺ സിഇഒ ആൻഡി ജാസി, കാര്യക്ഷമമല്ലാത്ത ജീവനക്കാരെ കണ്ടെത്തുന്നതിനായി ഒരു പരാതി സംവിധാനം ഏർപ്പെടുത്തിയിരുന്നു. ഇതിലൂടെ 1,500 പ്രതികരണങ്ങളും 450-ൽ അധികം മാറ്റങ്ങളും സംഭവിച്ചതായി അദ്ദേഹം ഈ വർഷം ആദ്യം സൂചിപ്പിച്ചിരുന്നു. മാനേജർമാരുടെ എണ്ണം കുറയ്ക്കുന്നതുമായി ബന്ധപ്പെട്ട കാര്യങ്ങളും അദ്ദേഹം ശ്രദ്ധിക്കുന്നുണ്ട്. കൂടാതെ, പിരിച്ചുവിടപ്പെടുന്ന ജീവനക്കാരുമായി വിഷയം എങ്ങനെ ചർച്ച ചെയ്യണമെന്ന് ബന്ധപ്പെട്ട ടീം മാനേജർമാർക്ക് പരിശീലനം നൽകാനും ആവശ്യപ്പെട്ടിട്ടുണ്ട്.
ടെക് ലോകത്ത് ഈ വർഷം വലിയ തോതിലുള്ള തൊഴിൽ നഷ്ടമാണ് രേഖപ്പെടുത്തുന്നത്. Layoffs.fyi എന്ന വെബ്‌സൈറ്റിന്റെ കണക്കനുസരിച്ച്, ഈ വർഷം ഇതുവരെ 216 കമ്പനികളിൽ നിന്നായി 98,000 തൊഴിലവസരങ്ങൾ നഷ്ടപ്പെട്ടിട്ടുണ്ട്. കഴിഞ്ഞ വർഷം ഇത് 153,000 ആയിരുന്നു.