ടെക് ഭീമനായ ഷവോമിയുടെ ഇലക്ട്രിക് വാഹനമായ SU7 സെഡാന്റെ ഏറ്റവും പുതിയ പതിപ്പുകൾ പുറത്തിറങ്ങി. കഴിഞ്ഞ രണ്ട് വർഷമായി നടത്തിയ പരീക്ഷണങ്ങൾക്കും നിരീക്ഷണങ്ങൾക്കും ശേഷമാണ് കൂടുതൽ കരുത്താർന്ന മാറ്റങ്ങളുമായി വാഹനം വിപണിയിലെത്തുന്നത്. മാർച്ച് 19 മുതൽ ചൈനീസ് വിപണിയിൽ ഈ പരിഷ്കരിച്ച മോഡലുകൾ ഔദ്യോഗികമായി വിൽപ്പനയ്ക്കെത്തും. ഇന്ത്യൻ രൂപയിൽ ഏകദേശം 30 ലക്ഷം മുതൽ 41 ലക്ഷം വരെയാണ് വാഹനത്തിന്റെ വില പ്രതീക്ഷിക്കുന്നത്. കുറഞ്ഞ ചെലവിൽ മികച്ച സാങ്കേതികവിദ്യകൾ ലഭ്യമാക്കുന്നതിലൂടെ ലോകത്തെ മുൻനിര ഇലക്ട്രിക് വാഹന നിർമ്മാതാക്കൾക്ക് വലിയ വെല്ലുവിളി ഉയർത്താനാണ് ഷവോമി ഇതിലൂടെ ലക്ഷ്യമിടുന്നത്.
പുതിയ മോഡലുകളിൽ ഏറ്റവും വലിയ മാറ്റം വരുത്തിയിരിക്കുന്നത് ചാർജിംഗ് വേഗതയിലാണ്. ഹൈ വോൾട്ടേജ് സംവിധാനങ്ങൾ ഉൾപ്പെടുത്തിയതിലൂടെ ബാറ്ററി ചൂടാകുന്നത് കുറയ്ക്കാനും വേഗത്തിൽ ഊർജ്ജം നിറയ്ക്കാനും സാധിക്കും. ഇതിൽ ‘മാക്സ്’ പതിപ്പ് വെറും 15 മിനിറ്റ് ചാർജ് ചെയ്താൽ 670 കിലോമീറ്റർ വരെ സഞ്ചരിക്കാനുള്ള പവർ നൽകുന്നുവെന്നത് വിപണിയിലെ വലിയൊരു വിപ്ലവമാണ്. കൂടാതെ ഓരോ പതിപ്പിനും മികച്ച റേഞ്ചും കമ്പനി വാഗ്ദാനം ചെയ്യുന്നു. ഒറ്റത്തവണ ചാർജ് ചെയ്താൽ സ്റ്റാൻഡേർഡ് മോഡലിന് 720 കിലോമീറ്ററും മാക്സ് മോഡലിന് 835 കിലോമീറ്ററും റേഞ്ച് ലഭിക്കുമ്പോൾ, ‘പ്രോ’ പതിപ്പ് ഏകദേശം 902 കിലോമീറ്റർ വരെ സഞ്ചരിക്കാൻ ശേഷിയുള്ളതാണ്.
ഫാക്ടറിയിലെ നവീകരണ പ്രവർത്തനങ്ങൾക്കായി കുറച്ചു കാലത്തേക്ക് ഉൽപ്പാദനത്തിൽ നിയന്ത്രണം ഏർപ്പെടുത്തിയിരുന്നതിനാൽ കഴിഞ്ഞ മാസങ്ങളിൽ കുറഞ്ഞ യൂണിറ്റുകൾ മാത്രമാണ് വിപണിയിലെത്തിയിരുന്നത്. എന്നാൽ വലിയൊരു തിരിച്ചുവരവിനുള്ള തയ്യാറെടുപ്പിന്റെ ഭാഗമായിരുന്നു ഈ നീക്കമെന്ന് ഷവോമി വ്യക്തമാക്കുന്നു. നിലവിൽ ചൈനയിലുടനീളമുള്ള ഷോറൂമുകളിൽ പുതിയ മാറ്റങ്ങളോടെയുള്ള SU7 ലഭ്യമായിത്തുടങ്ങിയിട്ടുണ്ട്. ഈ ആധുനിക സവിശേഷതകൾ വരും മാസങ്ങളിൽ ഷവോമിയുടെ വാഹന വിപണിയിലെ കുതിപ്പിന് കരുത്ത് പകരുമെന്നാണ് വിലയിരുത്തപ്പെടുന്നത്