കൊച്ചി: ജന്മനായുള്ള ഹൃദയവൈകല്യങ്ങൾക്കായി ശസ്ത്രക്രിയക്ക് വിധേയരായ കുട്ടികളിലെ മസ്തിഷ്ക വികാസവും മാനസിക വളർച്ചയും ലക്ഷ്യമിട്ട് കൊച്ചി അമൃത ആശുപത്രിയിൽ ദേശീയ സെമിനാർ സംഘടിപ്പിക്കുന്നു. ആശുപത്രിയിലെ പീഡിയാട്രിക് കാർഡിയോളജി വിഭാഗത്തിന് കീഴിലുള്ള ‘പ്രോജക്ട് മേധ’ (Project Medha) ന്യൂറോ ഡെവലപ്മെന്റൽ ആൻഡ് കോഗ്നിറ്റീവ് കെയർ യൂണിറ്റിന്റെ ആഭിമുഖ്യത്തിലാണ് പരിപാടി. മാർച്ച് 28 ശനിയാഴ്ച രാവിലെ 9 മുതൽ വൈകിട്ട് 5 വരെ അമൃത ആശുപത്രിയിലാണ് സെമിനാർ നടക്കുന്നത്. ഇന്ത്യയിൽ ഉടനീളം കോൺജെനിറ്റൽ ഹൃദയരോഗമുള്ള കുട്ടികൾ നേരിടുന്ന ന്യൂറോ-ഡെവലപ്മെന്റൽ പ്രശ്നങ്ങൾ പരിഹരിക്കുന്നതിനായി പ്രവർത്തിക്കുന്ന CSR പദ്ധതിയായ പ്രോജക്ട് മേധയ്ക്ക് ബെംഗളൂരുവിലെ പ്രേംജി ഇൻവെസ്റ്റാണ് സാമ്പത്തിക പിന്തുണ നൽകുന്നത്.
‘ഹൃദയശസ്ത്രക്രിയക്ക് ശേഷം കുട്ടികളിലെ മസ്തിഷ്ക വികാസവും വിജ്ഞാനപരമായ വളർച്ചയും’ എന്ന വിഷയത്തിലാണ് ചർച്ചകൾ നടക്കുക. ശസ്ത്രക്രിയക്ക് ശേഷം കുട്ടികൾ നേരിടുന്ന പഠനപരമായ ബുദ്ധിമുട്ടുകൾ, പെരുമാറ്റ വൈകല്യങ്ങൾ, ശ്രദ്ധക്കുറവ് തുടങ്ങിയവ നേരത്തെ തിരിച്ചറിയുന്നതിനും പരിഹരിക്കുന്നതിനുമായി ആരോഗ്യപ്രവർത്തകർക്കും അധ്യാപകർക്കും രക്ഷിതാക്കൾക്കും അവബോധം നൽകുകയാണ് സെമിനാറിന്റെ ലക്ഷ്യം.
ഡോ. അരുണ് സിംഗ് (മുൻ നാഷണൽ അഡ്വൈസർ, RBSK), ഡോ. ദീപ ഭാസ്കരൻ (ഡയറക്ടർ, CDC തിരുവനന്തപുരം), ഡോ. ജയശങ്കര റെഡ്ഡി (ഡീൻ, സ്കൂൾ ഓഫ് സോഷ്യൽ സയൻസസ്, ക്രൈസ്റ്റ് യൂണിവേഴ്സിറ്റി, ബെംഗളൂരു) എന്നിവരടങ്ങുന്ന വിദഗ്ധസംഘം പങ്കെടുക്കും. അമൃത ആശുപത്രിയിലെ ഡോ. കൃഷ്ണകുമാർ, ഡോ. മനു രാജ് തുടങ്ങിയ വിദഗ്ധരും വിവിധ സെഷനുകളിൽ സംസാരിക്കും. യുകെയിലെ റോയൽ ഹോസ്പിറ്റലിൽ നിന്നുള്ള പ്രൊഫ. കിർസ്റ്റൺ വെരിറ്റിയും സെമിനാറിൽ പങ്കുചേരും.
ഡെവലപ്മെന്റൽ പീഡിയാട്രീഷ്യൻമാർ, ക്ലിനിക്കൽ സൈക്കോളജിസ്റ്റുകൾ, നഴ്സുമാർ, അധ്യാപകർ, മെഡിക്കൽ വിദ്യാർത്ഥികൾ തുടങ്ങിയവർക്ക് സെമിനാറിൽ പങ്കെടുക്കാം. രജിസ്ട്രേഷനും കൂടുതൽ വിവരങ്ങൾക്കുമായി ഓർഗനൈസിംഗ് സെക്രട്ടറി സോനം മനോജിനെ 9902422227, 7356088172 എന്നീ നമ്പറുകളിൽ ബന്ധപ്പെടുക.