വിഘ്നേഷ് ശിവന്റെ സംവിധാനത്തിൽ പ്രദീപ് രംഗനാഥൻ നായകനായെത്തിയ ‘ലവ് ഇൻഷുറൻസ് കമ്പനി’ ബോക്സ് ഓഫീസിൽ പതറുന്നു. ലവ് ടുഡേ, ഡ്രാഗൺ, ഡ്യുഡ് എന്നീ ചിത്രങ്ങളിലൂടെ തുടർച്ചയായി മൂന്ന് 100 കോടി ക്ലബ്ബ് വിജയങ്ങൾ സ്വന്തമാക്കിയ പ്രദീപിന്റെ കരിയറിലെ ആദ്യ പരാജയമായാണ് ഈ ചിത്രം വിലയിരുത്തപ്പെടുന്നത്. സയൻസ് ഫിക്ഷൻ റൊമാന്റിക് കോമഡി വിഭാഗത്തിലെത്തിയ ചിത്രത്തിന് ആരാധകർ വലിയ പ്രതീക്ഷ നൽകിയിരുന്നെങ്കിലും, ആവേശത്തിനൊത്ത പ്രകടനം കാഴ്ചവെക്കാൻ തിയേറ്ററുകളിൽ സാധിച്ചില്ല.
റിലീസ് ചെയ്ത് മൂന്നാം വാരത്തിലേക്ക് കടക്കുമ്പോൾ 70 കോടിക്ക് താഴെയാണ് ചിത്രത്തിന്റെ ആകെ കളക്ഷനെന്നാണ് റിപ്പോർട്ടുകൾ സൂചിപ്പിക്കുന്നത്. വലിയ ബജറ്റിൽ ഒരുങ്ങിയ സിനിമയ്ക്ക് മുടക്കുമുതൽ പോലും തിരിച്ചുപിടിക്കാനായിട്ടില്ല. തിരക്കഥയിലെ പാളിച്ചകളും അനുഭവപ്പെടുന്ന ലാഗുമാണ് സിനിമയ്ക്ക് തിരിച്ചടിയായതെന്ന് സോഷ്യൽ മീഡിയയിൽ സിനിമാപ്രേമികൾ വിലയിരുത്തുന്നു. പലയിടങ്ങളിലും ചിത്രം ഇതിനകം തന്നെ വാഷൗട്ടായിക്കഴിഞ്ഞു, ഇത് പ്രദീപ് രംഗനാഥന്റെ കരിയറിലെ വിജയക്കുതിപ്പിന് ചെറിയൊരു മങ്ങലേൽപ്പിച്ചിട്ടുണ്ട്.
വ്യത്യസ്തമായ തീം അവതരിപ്പിച്ചതിൽ സംവിധായകൻ വിഘ്നേഷ് ശിവന് ചിലയിടങ്ങളിൽ നിന്ന് കയ്യടി ലഭിക്കുന്നുണ്ടെങ്കിലും മൊത്തത്തിലുള്ള ബോക്സ് ഓഫീസ് പരാജയം നിഴലിച്ചു നിൽക്കുന്നു. പ്രദീപ് രംഗനാഥനൊപ്പം ക്രിതി ഷെട്ടി, എസ്.ജെ. സൂര്യ, യോഗി ബാബു എന്നിവരടങ്ങുന്ന വമ്പൻ താരനിരയും അനിരുദ്ധ് രവിചന്ദറിന്റെ സംഗീതവും ചിത്രത്തിനുണ്ടായിരുന്നു. സെവൻ സ്ക്രീൻ സ്റ്റുഡിയോസും റൗഡി പിക്ചേഴ്സും ചേർന്ന് നിർമ്മിച്ച ഈ ചിത്രം തമിഴിന് പുറമെ മലയാളം ഉൾപ്പെടെയുള്ള ദക്ഷിണേന്ത്യൻ ഭാഷകളിലും റിലീസ് ചെയ്തിരുന്നു.