സീറ്റ് തകരാറിനെത്തുടർന്ന് ഹ്യുണ്ടായി പാലിസേഡിന് പിന്നാലെ കിയ ടെല്ലുറൈഡ് എസ്യുവികളുടെയും വിൽപ്പന നിർത്തിവെക്കാൻ നിർദ്ദേശം. പിൻവശത്തെ പവർ സീറ്റുകൾ പ്രവർത്തനരഹിതമാകുന്നത് സുരക്ഷാ ഭീഷണിയുണ്ടാക്കുമെന്ന കണ്ടെത്തലിനെത്തുടർന്നാണ് നടപടി. ഏതാനും ദിവസങ്ങൾക്ക് മുമ്പ് പാലിസേഡ് എസ്യുവി അപകടത്തിൽപ്പെട്ട് ഒരു കുട്ടിയുടെ ജീവൻ നഷ്ടപ്പെട്ട പശ്ചാത്തലത്തിലാണ് വാഹന നിർമ്മാതാക്കൾ ഈ മുൻകരുതൽ സ്വീകരിച്ചിരിക്കുന്നത്.
2027 മോഡൽ കിയ ടെല്ലുറൈഡ് എസ്യുവികളിലേക്കാണ് ഇപ്പോൾ തിരിച്ചുവിളിക്കൽ നടപടി വ്യാപിപ്പിച്ചിരിക്കുന്നത്. ഈ മോഡലുകളുടെ വിൽപ്പന ഉടൻ നിർത്തിവയ്ക്കണമെന്നും പൂർണ്ണമായ അറ്റകുറ്റപ്പണികൾക്ക് ശേഷം മാത്രമേ വിപണിയിൽ എത്തിക്കാവൂ എന്നും ഡീലർമാർക്ക് കർശന നിർദ്ദേശം നൽകി. ഏകദേശം 568 കാറുകളെ ഈ പ്രശ്നം ബാധിക്കാൻ സാധ്യതയുണ്ടെന്നാണ് കണക്കാക്കുന്നത്. എക്സിക്യൂട്ടീവ് പാക്കേജുള്ള ടെല്ലുറൈഡിന്റെ ഹൈബ്രിഡ് SX പ്രസ്റ്റീജ്, X-ലൈൻ SX പ്രസ്റ്റീജ് വകഭേദങ്ങളിലെ രണ്ടാം നിര പവർ സീറ്റുകൾക്കാണ് തകരാർ കണ്ടെത്തിയിരിക്കുന്നത്. സീറ്റുകൾ മടങ്ങുമ്പോഴോ നിവരുമ്പോഴോ വഴിയിലുള്ള വ്യക്തികളെയോ വസ്തുക്കളെയോ തിരിച്ചറിയുന്നതിൽ പരാജയപ്പെടുന്നു എന്നതാണ് പ്രധാന പ്രശ്നം. സമ്പർക്കമുണ്ടായാൽ പോലും സീറ്റ് ചലിക്കുന്നത് തുടരുന്നത് ഗുരുതരമായ അപകടങ്ങൾക്ക് കാരണമായേക്കാം.
2026 ഹ്യുണ്ടായി പാലിസേഡ് മോഡലുകളിൽ റിപ്പോർട്ട് ചെയ്ത അതേ സാങ്കേതിക തകരാറാണ് കിയയിലുമുള്ളതെന്ന് നാഷണൽ ഹൈവേ ട്രാഫിക് സേഫ്റ്റി അഡ്മിനിസ്ട്രേഷൻ വ്യക്തമാക്കുന്നു. എന്നാൽ കിയ കാറുകളിൽ ഇതുവരെ പരിക്കുകളൊന്നും റിപ്പോർട്ട് ചെയ്തിട്ടില്ല. മുൻകരുതൽ നടപടിയുടെ ഭാഗമായി പവർ ഫോൾഡിംഗ് ഫീച്ചർ ഉപയോഗിക്കുമ്പോൾ കുട്ടികളെ പിൻസീറ്റിലോ പരിസരത്തോ ഇരുത്തരുതെന്ന് കമ്പനി ഉടമകൾക്ക് നിർദ്ദേശം നൽകി. ഹ്യുണ്ടായിയുടെ പ്രാഥമിക തിരിച്ചുവിളിക്കലിൽ യുഎസിൽ മാത്രം 61,000 പാലിസേഡ് എസ്യുവികൾ ഉൾപ്പെട്ടിട്ടുണ്ട്. കാനഡയിലും സമാനമായ രീതിയിൽ വാഹനങ്ങളുടെ വിൽപ്പന നിയന്ത്രിച്ചിരിക്കുകയാണ്. തകരാർ പൂർണ്ണമായി പരിഹരിക്കുന്നത് വരെ സീറ്റുകളുടെ ഓട്ടോമാറ്റിക് ഫോൾഡിംഗ് ഫീച്ചർ ഉപയോഗിക്കുമ്പോൾ അതീവ ജാഗ്രത പാലിക്കണമെന്നും കമ്പനി അറിയിച്ചു.