കൊച്ചി: കുഞ്ഞിന്റെ ഒന്നാം പിറന്നാളിനോടനുബന്ധിച്ച് അമ്മയായ വിവരം ആരാധകരുമായി പങ്കുവെച്ച് നടി പത്മപ്രിയ. കുഞ്ഞിന്റെ മുഖം വെളിപ്പെടുത്താതെയുള്ള ചിത്രങ്ങളാണ് താരം സമൂഹമാധ്യമങ്ങളിൽ പങ്കുവെച്ചത്. ‘ജീവന്റെ 365 ദിവസങ്ങൾ’ എന്ന അടിക്കുറിപ്പോടെയാണ് പത്മപ്രിയ പോസ്റ്റ് പങ്കുവെച്ചത്. ‘കടപ്പാട്’, ‘ഞങ്ങളുടെ കഥ’, ‘കുഞ്ഞുനിമിഷങ്ങൾ’ എന്നീ ഹാഷ്ടാഗുകളും ചിത്രങ്ങൾക്കൊപ്പം ചേർത്തിട്ടുണ്ട്.
ഒരു ചിത്രത്തിൽ രണ്ട് മുതിർന്നവരുടെ കൈകൾക്കിടയിൽ കുഞ്ഞിന്റെ കുഞ്ഞിക്കൈയും മറ്റൊന്നിൽ അമ്മയുടെ വസ്ത്രത്തിൽ മുറുകെപ്പിടിച്ചിരിക്കുന്ന കുഞ്ഞിക്കൈയുമാണ് കാണുന്നത്. എന്നാൽ കുഞ്ഞിന്റെ മുഖമോ ലിംഗമോ താരം വെളിപ്പെടുത്തിയിട്ടില്ല.
ഗർഭിണിയായിരുന്ന വിവരമോ കുഞ്ഞ് ജനിച്ച വിവരമോ ഇതുവരെ പൊതുവിൽ പങ്കുവെച്ചിരുന്നില്ല. കുഞ്ഞിന് ഒരു വയസ്സ് തികഞ്ഞ ശേഷമാണ് പത്മപ്രിയ ഇക്കാര്യം ആരാധകരെ അറിയിച്ചത്. ഭർത്താവ് ജാസ്മിൻ ഷായെ ടാഗ് ചെയ്താണ് താരം പോസ്റ്റ് പങ്കുവെച്ചത്.
പോസ്റ്റിന് താഴെ നിരവധി താരങ്ങളും ആരാധകരും ആശംസകളുമായി എത്തി. നടി അഭിരാമി, റിമ കല്ലിങ്കൽ, ഭാമ, സോന നായർ, സംവൃത സുനിൽ, പാർവതി തിരുവോത്ത് എന്നിവരടക്കം നിരവധി പേർ ആശംസകൾ അറിയിച്ചു.
2014-ലാണ് പത്മപ്രിയ ഗുജറാത്ത് സ്വദേശിയായ ജാസ്മിൻ ഷായെ വിവാഹം കഴിച്ചത്. മലയാളം, തമിഴ്, തെലുങ്ക്, കന്നഡ, ബംഗാളി ഭാഷകളിലായി ശ്രദ്ധേയമായ നിരവധി ചിത്രങ്ങളിൽ അഭിനയിച്ച പത്മപ്രിയ അടുത്തിടെ താരസംഘടനയായ ‘അമ്മ’യിൽനിന്ന് രാജിവെച്ചതോടെ വാർത്തകളിൽ ഇടം നേടിയിരുന്നു.