ഇന്ത്യയുടെ ആദ്യ സ്വകാര്യ ഭ്രമണപഥ വിക്ഷേപണ വാഹനമായ വിക്രം-1 വിജയകരമായി ബഹിരാകാശത്തേക്ക് കുതിച്ചതിന് പിന്നാലെ സ്കൈറൂട്ട് എയ്റോസ്പേസ് ടീമിനെ അഭിനന്ദിച്ച് പ്രധാനമന്ത്രി നരേന്ദ്ര മോദി. രാജ്യത്തിന്റെ ബഹിരാകാശ യാത്രയിലെ സുപ്രധാന നാഴികക്കല്ലാണ് ഈ ദൗത്യമെന്നും, ഇന്ത്യയുടെ സ്വകാര്യ ബഹിരാകാശ മേഖലയ്ക്ക് പുതിയ അധ്യായത്തിന് തുടക്കമായെന്നും അദ്ദേഹം പറഞ്ഞു. വിക്ഷേപണത്തിന് പിന്നാലെ സ്കൈറൂട്ട് ടീമുമായി ഫോണിൽ സംസാരിച്ച പ്രധാനമന്ത്രി, ചരിത്രപരമായ ലിഫ്റ്റ് ഓഫ് താൻ തത്സമയം വീക്ഷിച്ചിരുന്നുവെന്നും ഈ നേട്ടത്തിന് പിന്നിൽ പ്രവർത്തിച്ച യുവ എഞ്ചിനീയർമാരെയും ശാസ്ത്രജ്ഞരെയും പ്രത്യേകം അഭിനന്ദിക്കുകയും ചെയ്തു.
“മുഴുവൻ ടീമിനെയും ഞാൻ അഭിനന്ദിക്കുന്നു. വിക്ഷേപണത്തിന് പിന്നിലെ ടീം വളരെ ചെറുപ്പക്കാരാണ്. ഇത് ഒരു തുടക്കം മാത്രമാണ്, ഇനി ഇതിലും വലിയ നേട്ടങ്ങളിലേക്ക് മുന്നേറണം,” എന്നാണ് പ്രധാനമന്ത്രി പറഞ്ഞത്. കൂടാതെ, സ്കൈറൂട്ട് എയ്റോസ്പേസ് ടീമിനെ നേരിൽ കാണാൻ ഉടൻ തന്നെ ക്ഷണിക്കുകയും ചെയ്തു. ഹൈദരാബാദ് ആസ്ഥാനമായുള്ള സ്കൈറൂട്ട് എയ്റോസ്പേസിന്റെ ‘മിഷൻ ആഗമാൻ’ ദൗത്യത്തിന്റെ ഭാഗമായി ശ്രീഹരിക്കോട്ടയിലെ സതീഷ് ധവാൻ ബഹിരാകാശ കേന്ദ്രത്തിൽ നിന്നാണ് വിക്രം-1 വിക്ഷേപിച്ചത്. ഇന്ത്യയിൽ സ്വകാര്യമായി വികസിപ്പിച്ച ഒരു ഓർബിറ്റൽ ക്ലാസ് റോക്കറ്റ് ആദ്യമായി ഭ്രമണപഥ ലക്ഷ്യമിട്ട് വിജയകരമായി വിക്ഷേപിക്കപ്പെട്ടത് രാജ്യത്തിന്റെ സ്വകാര്യ ബഹിരാകാശ ചരിത്രത്തിലെ നിർണായക നേട്ടമായാണ് വിലയിരുത്തപ്പെടുന്നത്.
ബഹിരാകാശ മേഖലയിലെ ഇന്ത്യയുടെ സ്വയംപര്യാപ്തതയുടെ തെളിവാണ് ഈ വിജയമെന്ന് പ്രധാനമന്ത്രി പറഞ്ഞു. “ബഹിരാകാശ രംഗത്തും ഇന്ത്യയ്ക്ക് ആത്മനിർഭരമാകാൻ കഴിയുമെന്ന് നിങ്ങൾ ലോകത്തിന് തെളിയിച്ചിരിക്കുന്നു,” എന്നാണ് അദ്ദേഹം ടീമിനോട് പറഞ്ഞത്. വിക്രം-1 ദൗത്യത്തിൽ തന്റെ കൈപ്പടയിൽ എഴുതിയ “വന്ദേ മാതരം” സന്ദേശവും ബഹിരാകാശത്തേക്ക് യാത്ര ചെയ്തതായി പരാമർശിച്ച പ്രധാനമന്ത്രി, “ഈ ദൗത്യത്തിലൂടെ വന്ദേ മാതരം എന്ന സന്ദേശവും പുതിയ ഉയരങ്ങളിലെത്തി” എന്നും പറഞ്ഞു.
ഏഴ് ഘട്ടങ്ങളുള്ള കാർബൺ കോംപോസിറ്റ് വിക്ഷേപണ വാഹനമായ വിക്രം-1, 350 കിലോഗ്രാം വരെ ഭാരമുള്ള ചെറിയ ഉപഗ്രഹങ്ങളെ താഴ്ന്ന ഭ്രമണപഥത്തിലെത്തിക്കാൻ ശേഷിയുള്ളതാണ്. ദൗത്യത്തിൽ വിവിധ സാങ്കേതിക പരീക്ഷണ പേലോഡുകൾക്കൊപ്പം റോക്കറ്റ് നിർമിച്ച എഞ്ചിനീയർമാരുടെയും ടെക്നീഷ്യൻമാരുടെയും ഒപ്പുകളും ഉൾപ്പെടുത്തിയിരുന്നു. ഇതിലൂടെ ഇന്ത്യയുടെ സ്വകാര്യ ബഹിരാകാശ മേഖല സാങ്കേതികമായി പുതിയ ഉയരങ്ങളിലേക്ക് കടന്നിരിക്കുകയാണെന്നാണ് വിദഗ്ധരുടെ വിലയിരുത്തൽ.