മെറ്റയുടെ ഉടമസ്ഥതയിലുള്ള ജനപ്രിയ മെസേജിംഗ് ആപ്പായ വാട്ട്സ്ആപ്പ് ഒരു വലിയ മാറ്റത്തിനൊരുങ്ങുന്നു. ഉപയോക്താക്കൾക്ക് കൂടുതൽ നൂതനമായ സൗകര്യങ്ങൾ ലഭ്യമാക്കുന്നതിനായി ‘വാട്ട്സ്ആപ്പ് പ്രീമിയം’ എന്ന സബ്സ്ക്രിപ്ഷൻ മോഡൽ അവതരിപ്പിക്കാനാണ് കമ്പനി ലക്ഷ്യമിടുന്നത്. ആർട്ടിഫിഷ്യൽ ഇന്റലിജൻസ്, പുതിയ ബിസിനസ് ടൂളുകൾ എന്നിവയ്ക്ക് പുറമെ സാധാരണ ഉപയോക്താക്കൾക്കായി ചില പ്രത്യേക ഫീച്ചറുകളും പണമടച്ചുള്ള പതിപ്പിൽ ഉൾപ്പെടുത്തിയേക്കാം. വാട്ട്സ്ആപ്പിന്റെ വരാനിരിക്കുന്ന ആൻഡ്രോയിഡ് ബീറ്റ പതിപ്പിൽ ഇതുസംബന്ധിച്ച സൂചനകൾ കണ്ടെത്തിയതായി പ്രമുഖ ടിപ്സ്റ്ററായ WaBetaInfo റിപ്പോർട്ട് ചെയ്യുന്നു.
പുതിയ പ്രീമിയം പതിപ്പിൽ കൂടുതൽ ആകർഷകമായ സ്റ്റിക്കറുകൾ, വിവിധ ആപ്പ് തീമുകൾ, ഓരോ ചാറ്റുകൾക്കും പ്രത്യേക റിംഗ്ടോണുകൾ സെറ്റ് ചെയ്യാനുള്ള സൗകര്യം തുടങ്ങിയവ ഉൾപ്പെട്ടേക്കുമെന്നാണ് നിലവിലെ സൂചന. തുടക്കത്തിൽ ഇത്തരം ഫീച്ചറുകൾ അത്ര പ്രലോഭനകരമായി തോന്നില്ലെങ്കിലും, ഭാവിയിൽ കൂടുതൽ പ്രായോഗികമായ ഒട്ടേറെ സംവിധാനങ്ങൾ ഇതിലൂടെ മെറ്റ വാഗ്ദാനം ചെയ്തേക്കാം. പ്രീമിയം ഫീച്ചറുകൾ പരീക്ഷിക്കുന്നതിനായി തിരഞ്ഞെടുക്കപ്പെട്ട ഉപയോക്താക്കളെ കമ്പനി വെയിറ്റിംഗ് ലിസ്റ്റിൽ ഉൾപ്പെടുത്താനാണ് പദ്ധതിയെന്നും റിപ്പോർട്ടുകൾ പറയുന്നു.
വാട്ട്സ്ആപ്പിന് പുറമെ ഇൻസ്റ്റാഗ്രാമിലും സമാനമായ പ്രീമിയം മാറ്റങ്ങൾ മെറ്റ കൊണ്ടുവരുന്നുണ്ട്. നമ്മളെ തിരികെ ഫോളോ ചെയ്യാത്തവരെ അറിയാനും, മറ്റുള്ളവർ അറിയാതെ സ്റ്റോറികൾ കാണാനുമുള്ള ഫീച്ചറുകൾ ഇൻസ്റ്റാഗ്രാം പ്രീമിയത്തിൽ പ്രതീക്ഷിക്കുന്നു. ഇത്രയും കാലം സൗജന്യമായി സേവനം നൽകിയിരുന്ന പ്ലാറ്റ്ഫോമുകളിൽ നിന്ന് വരുമാനം കണ്ടെത്താനുള്ള മെറ്റയുടെ വലിയ നീക്കമായാണ് ഇതിനെ വിലയിരുത്തുന്നത്. എങ്കിലും അടിസ്ഥാന സേവനങ്ങൾ എല്ലാവർക്കും സൗജന്യമായി തന്നെ തുടരാനാണ് സാധ്യത.