നിയമസഭാ തിരഞ്ഞെടുപ്പിൽ യുഡിഎഫിന് ഭൂരിപക്ഷം ലഭിച്ചാലും മന്ത്രിസഭയുടെ ഭാഗമാകാൻ ആർഎംപിഐ താല്പര്യപ്പെടുന്നില്ലെന്ന് സൂചന. ഇടതുപക്ഷ നിലപാടുകളിൽ വിട്ടുവീഴ്ച ചെയ്യാതിരിക്കാനാണ് പാർട്ടി ഇത്തരമൊരു നിലപാട് സ്വീകരിക്കുന്നത്. മന്ത്രിസഭയിൽ അംഗമായാൽ യുഡിഎഫിന്റെ എല്ലാ നയങ്ങളോടും യോജിച്ചു പോകേണ്ടി വരുമെന്നത് പാർട്ടിയുടെ സ്വതന്ത്രമായ ഇടതുപക്ഷ നിലപാടുകളെ ബാധിക്കുമെന്ന് ആർഎംപിഐ ഭയപ്പെടുന്നു. നിലവിൽ യുഡിഎഫ് അസോസിയേറ്റ് അംഗമാണെങ്കിലും മുന്നണിയുടെ ഔദ്യോഗിക ഘടകകക്ഷിയാകാൻ പാർട്ടിക്ക് പദ്ധതിയോ താത്പര്യമോ ഇല്ല.
അതേസമയം, വടകരയിലെ സ്ഥാനാർത്ഥിയായ കെ.കെ. രമയെ മന്ത്രിസഭയിൽ ഉൾപ്പെടുത്താൻ കോൺഗ്രസിന് താല്പര്യമുണ്ട്. ഇതിനായി ആർഎംപിഐയെ മുന്നണിയിലെത്തിക്കാൻ കോൺഗ്രസ് സമ്മർദ്ദം ചെലുത്താനാണ് സാധ്യത. ഭരണം ലഭിക്കുമെന്ന പ്രതീക്ഷകൾക്കിടയിൽ കോൺഗ്രസിനുള്ളിൽ മുഖ്യമന്ത്രി സ്ഥാനത്തെച്ചൊല്ലിയുള്ള ചർച്ചകളും മുറുകുകയാണ്. എറണാകുളത്ത് നിന്നൊരാൾ മുഖ്യമന്ത്രിയാകണമെന്ന ഡിസിസി പ്രസിഡന്റ് മുഹമ്മദ് ഷിയാസിന്റെ പ്രസ്താവന വി.ഡി. സതീശനെ ലക്ഷ്യം വെച്ചുള്ളതായിരുന്നു. എന്നാൽ ഇത്തരം ചർച്ചകൾ ഇപ്പോൾ അനാവശ്യമാണെന്ന് വി.എം. സുധീരൻ, കെ. മുരളീധരൻ, കെ. ബാബു തുടങ്ങിയ മുതിർന്ന നേതാക്കൾ പ്രതികരിച്ചു.