പ്രധാനമന്ത്രി നരേന്ദ്ര മോദി വോട്ടിനു വേണ്ടി നാടകം കളിക്കുകയാണെന്നും തിരഞ്ഞെടുപ്പിന് ശേഷം വാഗ്ദാനങ്ങൾ പാലിക്കാതെ അപ്രത്യക്ഷനാകുമെന്നും ആരോപിച്ച് കോൺഗ്രസ് എംപി രാഹുൽ ഗാന്ധി. ബീഹാറിലെ ബെഗുസാരായിയിൽ നടന്ന റാലിയെ അഭിസംബോധന ചെയ്യുകയായിരുന്നു അദ്ദേഹം.”നരേന്ദ്ര മോദി പ്രസംഗങ്ങൾ നടത്തുന്നു, വരുന്നു, വാഗ്ദാനങ്ങൾ നൽകുന്നു, തിരഞ്ഞെടുപ്പ് ദിവസം വരെ നിങ്ങൾ ആവശ്യപ്പെടുന്നതെന്തും അദ്ദേഹം ചെയ്യുമെന്ന് പറയുന്നു. എന്നാൽ തിരഞ്ഞെടുപ്പിന് ശേഷം അദ്ദേഹം ബീഹാറിലേക്ക് വരുകയോ നിങ്ങളെ കേൾക്കുകയോ ചെയ്യുന്നില്ല. അദ്ദേഹം വെറുതെ പോകുന്നു,” രാഹുൽ ഗാന്ധി ആരോപിച്ചു.
“വോട്ടിനു വേണ്ടി പ്രധാനമന്ത്രി എന്തും ചെയ്യും. അദ്ദേഹത്തോട് യോഗ ചെയ്യാൻ പറയൂ, അദ്ദേഹം ചെയ്യും. പക്ഷേ, തിരഞ്ഞെടുപ്പിനുശേഷം, പാട്ടും നൃത്തവുമെല്ലാം അദാനിയും അംബാനിയും ചെയ്യും. ഇതെല്ലാം വെറും നാടകം മാത്രമാണ്,” രാഹുൽ പറഞ്ഞു.
ഇന്ത്യ-പാകിസ്ഥാൻ സംഘർഷം അവസാനിപ്പിക്കുമെന്ന ട്രംപിന്റെ അവകാശവാദങ്ങളെ മുൻനിർത്തി രാഹുൽ ഗാന്ധി പ്രധാനമന്ത്രി മോദിക്കെതിരെ ഗുരുതരമായ ആരോപണം ഉന്നയിച്ചു. “56 ഇഞ്ച് നെഞ്ചളവുണ്ടെന്ന് പറയുന്ന പ്രധാനമന്ത്രി മോദിക്ക് ട്രംപിനെ പേടിയാണ്.” ഓപ്പറേഷൻ സിന്ദൂർ നിർത്താൻ ട്രംപ് മോദിയോട് ആവശ്യപ്പെട്ടു, രണ്ട് ദിവസത്തിനുള്ളിൽ അദ്ദേഹം അത് ചെയ്തു എന്നും രാഹുൽ ആരോപിച്ചു.
“സത്യം പറഞ്ഞാൽ, അദ്ദേഹം ട്രംപിനെ ഭയപ്പെടുക മാത്രമല്ല, അദാനിയും അംബാനിയും റിമോട്ട് കൺട്രോളിൽ നിന്ന് നിയന്ത്രിക്കുകയും ചെയ്യുന്നു,” കോൺഗ്രസ് നേതാവ് കൂട്ടിച്ചേർത്തു. ജിഎസ്ടി, നോട്ട് നിരോധനം തുടങ്ങിയ മോദി സർക്കാരിന്റെ എല്ലാ പ്രധാന തീരുമാനങ്ങളും ചെറുകിട ബിസിനസുകളെ നശിപ്പിക്കാനും വൻകിട ബിസിനസുകൾക്ക് നേട്ടമുണ്ടാക്കാനും ലക്ഷ്യമിട്ടുള്ളതായിരുന്നുവെന്നും അദ്ദേഹം അവകാശപ്പെട്ടു.
തൊഴിലില്ലായ്മ പോലുള്ള യഥാർത്ഥ പ്രശ്‌നങ്ങളിൽ നിന്ന് യുവാക്കളുടെ ശ്രദ്ധ തിരിക്കാനാണ് മോദി റീലുകൾ കാണാൻ ആവശ്യപ്പെടുന്നതെന്നും രാഹുൽ ആരോപിച്ചു. അതേസമയം, ബീഹാറിൽ മഹാഗത്ബന്ധൻ അധികാരത്തിൽ വന്നാൽ മികച്ച വിദ്യാഭ്യാസം നൽകുമെന്നും, കേന്ദ്രത്തിൽ ഇന്ത്യാ ബ്ലോക്ക് അധികാരത്തിൽ വരുന്ന ദിവസം നളന്ദ സർവകലാശാലയുടെ മാതൃകയിൽ ഒരു പുതിയ സർവകലാശാല സ്ഥാപിക്കുമെന്നും രാഹുൽ ഗാന്ധി ഉറപ്പുനൽകി. “ലോകമെമ്പാടുമുള്ള വിദ്യാർത്ഥികൾ വന്ന് പ്രവേശനം നേടുന്ന ഒരു സർവകലാശാല ഞങ്ങൾ തുറക്കും,” അദ്ദേഹം പറഞ്ഞു
ബീഹാറിൽ നവംബർ 6, 11 തീയതികളിൽ രണ്ട് ഘട്ടങ്ങളിലായാണ് നിയമസഭാ തിരഞ്ഞെടുപ്പ് നടക്കുന്നത്. നവംബർ 14-നാണ് ഫലം പ്രഖ്യാപിക്കുക. നേരത്തെ ഒക്ടോബർ 29-ന് മുസാഫർപൂരിൽ നടത്തിയ റാലിയിലും രാഹുൽ ഗാന്ധി മോദിക്കെതിരെ സമാനമായ ‘ പരാമർശം നടത്തിയിരുന്നു, ഇതിനെതിരെ ബിജെപി തിരഞ്ഞെടുപ്പ് കമ്മീഷന് പരാതി നൽകിയിരുന്നു.