സാങ്കേതികവിദ്യയുടെ വളർച്ചയ്ക്കൊപ്പം സൗകര്യങ്ങൾ വർദ്ധിക്കുമ്പോൾ തന്നെ, സൈബർ തട്ടിപ്പുകളും പുതിയ രീതികളിൽ പെരുകുകയാണ്. സാമ്പത്തിക ഇടപാടുകൾക്കായി ഓൺലൈൻ സംവിധാനങ്ങളെ അമിതമായി ആശ്രയിക്കുന്ന ഈ കാലത്ത്, വളരെ സൂക്ഷ്മതയോടെ വേണം ഓരോ ചുവടും വെക്കാൻ. ഇപ്പോൾ റിപ്പോർട്ട് ചെയ്യുന്ന ഏറ്റവും പുതിയ തട്ടിപ്പ് രീതി UPI ആപ്പുകൾ കേന്ദ്രീകരിച്ചാണ്.
ഇതൊരു തരം “പണം തിരികെ നൽകൽ” തട്ടിപ്പാണ്. അപരിചിതരായ വ്യക്തികൾ നിങ്ങളുടെ UPI അക്കൗണ്ടിലേക്ക് പണം അയച്ചുവെന്നും, അത് അബദ്ധത്തിൽ സംഭവിച്ചതാണെന്നും പറഞ്ഞ് തിരികെ ആവശ്യപ്പെടുകയാണ് ഇവർ ചെയ്യുന്നത്. വിശ്വാസം നേടിയെടുക്കാൻ ആദ്യം അവർ ചെറിയ തുക നിങ്ങളുടെ അക്കൗണ്ടിലേക്ക് അയക്കുകയും ചെയ്യും. ഇതൊരു സത്യസന്ധമായ അബദ്ധമാണെന്ന് കരുതി തിരികെ പണം അയക്കുന്നവർ വലിയ കുരുക്കിലാണ് ചെന്നുചാടുന്നത്.
ഇത്തരം തട്ടിപ്പുകൾക്ക് പിന്നിൽ കൃത്യമായ ഗൂഢാലോചനയുണ്ട്. മോഷണത്തിലൂടെയോ മറ്റ് ഓൺലൈൻ കുറ്റകൃത്യങ്ങളിലൂടെയോ ലഭിക്കുന്ന പണം നിയമപരമായ അന്വേഷണങ്ങളിൽ നിന്ന് രക്ഷപ്പെടാനായി കുറ്റവാളികൾ പല ബാങ്ക് അക്കൗണ്ടുകളിലൂടെ കടത്തിവിടാറുണ്ട്. അത്തരത്തിൽ തട്ടിപ്പിലൂടെ കിട്ടിയ പണമാണ് നിങ്ങളുടെ അക്കൗണ്ടിലേക്ക് വരുന്നത്. ഇതിനുശേഷം നിങ്ങൾ ആ പണം തിരികെ അയക്കുമ്പോൾ, തട്ടിപ്പുകാർക്ക് അത് സുരക്ഷിതമായി സ്വന്തമാക്കാൻ സാധിക്കുന്നു. പിന്നീട് അന്വേഷണ ഏജൻസികൾ പണത്തിന്റെ സ്രോതസ്സ് തേടി വരുമ്പോൾ നിങ്ങളുടെ അക്കൗണ്ടും സംശയിക്കപ്പെടുന്നവരുടെ പട്ടികയിൽ ഉൾപ്പെടും. ഇത് നിങ്ങളുടെ അക്കൗണ്ട് മരവിപ്പിക്കാനും ബാങ്കിംഗ് സേവനങ്ങൾ നിഷേധിക്കപ്പെടാനും കാരണമാകും. അറിവില്ലാതെ നിങ്ങൾ ചെയ്ത ഒരു പ്രവർത്തിയിലൂടെ നിയമപരമായ കുരുക്കുകളിൽ അകപ്പെടാൻ ഇത് വഴിവെക്കും.
ഇത്തരം സൈബർ തട്ടിപ്പുകളിൽ നിന്ന് രക്ഷപ്പെടാൻ അതീവ ജാഗ്രത ആവശ്യമാണ്. അപരിചിതരുമായുള്ള സാമ്പത്തിക ഇടപാടുകൾ പൂർണ്ണമായും ഒഴിവാക്കുക. നിങ്ങളുടെ UPI, ബാങ്ക് വിവരങ്ങൾ കൃത്യമായി നിരീക്ഷിക്കുക. അസ്വാഭാവികമായി എന്തെങ്കിലും ശ്രദ്ധയിൽപ്പെട്ടാൽ ഉടൻ തന്നെ ബാങ്കിനെ അറിയിക്കുക. ഒരുപക്ഷേ, ഇത്തരത്തിൽ തട്ടിപ്പിന് ഇരയാവുകയാണെങ്കിൽ ഉടൻ തന്നെ ദേശീയ സൈബർ ക്രൈം ഹെൽപ്പ്ലൈൻ നമ്പറായ 1930-ൽ വിളിച്ച് പരാതി രജിസ്റ്റർ ചെയ്യാൻ മടിക്കരുത്.