കൊച്ചി: 2025 -26 വർഷത്തെ ഫെഡറൽ ബാങ്ക് ഹോർമിസ് മെമ്മോറിയൽ ഫൗണ്ടേഷൻ സ്കോളർഷിപ്പിന് അർഹരായ വിദ്യാർത്ഥികളുടെ പട്ടിക പ്രസിദ്ധീകരിച്ചു. കേരളം, തമിഴ്നാട്, കർണാടക, മഹാരാഷ്ട്ര, ഗുജറാത്ത്, തെലങ്കാന, ആന്ധ്രാപ്രദേശ് എന്നീ സംസ്ഥാനങ്ങളിൽ നിന്നുള്ള ഭിന്നശേഷിക്കാരുൾപ്പെടെയുള്ള വിദ്യാർത്ഥികൾക്കാണ് സ്കോളർഷിപ്പ് നൽകി വരുന്നത്. ഈ വർഷം 500 വിദ്യാർത്ഥികൾ സ്കോളർഷിപ്പിന് അർഹരായി.
എംബിബിഎസ്, ബി ഇ/ ബിടെക്/ ബി ആർക്ക്, ബിഎസ് സി നഴ്സിങ്, ബിഎസ് സി അഗ്രികള്ചർ, ബി ഡി എസ്, ബി വി എസ് സി, എംബിഎ/ പി ജി ഡി എം എന്നീ കോഴ്സുകളിലെ ഒന്നാം വർഷ വിദ്യാർത്ഥികൾക്കാണ് സ്കോളർഷിപ്പ് ലഭ്യമാക്കിയിരിക്കുന്നത്.
ബാങ്കിന്റെ സി എസ് ആർ പദ്ധതിയായി 2005 ൽ ആരംഭിച്ച സ്കോളർഷിപ്പിന് 2023 – 24 വരെ 2460 വിദ്യാർത്ഥികൾ അർഹരായിട്ടുണ്ട്. 2025 -26 സാമ്പത്തിക വർഷം ആറു സംസ്ഥാനങ്ങളിൽ നിന്നായി 3610 അപേക്ഷകൾ ലഭിച്ചിരുന്നു.
പിന്നാക്ക സാമൂഹിക പശ്ചാത്തലങ്ങളിൽ നിന്നുള്ള മിടുക്കരായ വിദ്യാർത്ഥികളെ സാമ്പത്തികമായി സഹായിക്കുകയും പ്രൊഫഷനൽ പഠനം പൂർത്തിയാക്കാൻ പ്രാപ്തരാക്കുകയും ചെയ്യുകയാണ് സ്കോളർഷിപ്പ് പദ്ധതിയുടെ ലക്ഷ്യം.
ബാങ്കിന്റെ സ്ഥാപകൻ കെ പി ഹോർമിസിന്റെ സ്മരണാർത്ഥം 1996ൽ ആരംഭിച്ച ഫെഡറൽ ബാങ്ക് ഹോർമിസ് മെമ്മോറിയൽ ഫൗണ്ടേഷൻ വിവിധ പരിശീലന പരിപാടികൾ നടത്തുന്നതിനൊപ്പം സെമിനാറുകൾ സംഘടിപ്പിക്കുകയും അടിസ്ഥാനസൗകര്യ വികസനത്തിനും പാരിസ്ഥിതിക- സാമൂഹിക- ഭരണ സംബന്ധമായ നൂതനാശയങ്ങൾ നടപ്പിൽ വരുത്തുന്നതിനും സാമ്പത്തികപിന്തുണ നൽകുകയും ചെയ്യുന്നു.