മഹാരാഷ്ട്രയിലെ പൂനെയിൽ ഉണ്ടായ വ്യാജമദ്യ ദുരന്തത്തിൽ 15 പേർ മരിച്ചു. നിരവധി പേർ ഇപ്പോഴും ഗുരുതരാവസ്ഥയിൽ ചികിത്സയിൽ തുടരുകയാണ്. മെഥനോൾ കലർത്തിയ വിഷമദ്യമാണ് മരണകാരണമെന്ന് പ്രാഥമിക പരിശോധനയിൽ വ്യക്തമായി.
സംഭവവുമായി ബന്ധപ്പെട്ട് മദ്യം വിതരണം ചെയ്ത യോഗേഷ് വാങ്കടെ ഉൾപ്പെടെ എട്ടുപേരെ പോലീസ് പിടികൂടി. നേരത്തെ തന്നെ നിരവധി ക്രിമിനൽ കേസുകളിൽ പ്രതിയായ യോഗേഷ്, പ്രദേശത്ത് വ്യാപകമായി വ്യാജമദ്യം വിതരണം ചെയ്തിരുന്നതായാണ് എക്സൈസ് വിഭാഗത്തിന്റെ കണ്ടെത്തൽ. മരിച്ചവരിൽ ഭൂരിഭാഗം പേരും 30-നും 60-നും ഇടയിൽ പ്രായമുള്ളവരാണ്. സംഭവസ്ഥലത്തുനിന്ന് ശേഖരിച്ച മദ്യത്തിന്റെ സാമ്പിളുകളും മരിച്ചവരുടെ രക്തസാമ്പിളുകളും വിദഗ്ധ പരിശോധനയ്ക്കായി ലാബിലേക്ക് അയച്ചിട്ടുണ്ട്.
സംഭവത്തിൽ മഹാരാഷ്ട്ര മുഖ്യമന്ത്രി ഉന്നതതല അന്വേഷണം പ്രഖ്യാപിച്ചു. കുറ്റക്കാർക്കെതിരെ ശക്തമായ നടപടി സ്വീകരിക്കുമെന്നും ആരും നിയമത്തിന് മുകളിൽ അല്ലെന്നും സർക്കാർ ഉറപ്പുനൽകി. അതേസമയം, പ്രദേശത്തെ വ്യാജമദ്യ നിർമ്മാണത്തെക്കുറിച്ച് നേരത്തെ മുന്നറിയിപ്പുകൾ ഉണ്ടായിരുന്നിട്ടും പോലീസ് നടപടി സ്വീകരിക്കാത്തത് ഗുരുതരമായ വീഴ്ചയാണെന്ന് എൻസിപി നേതാവ് രോഹിത് പവാർ ആരോപിച്ചു. പൂനെ സിറ്റി പോലീസ് കമ്മീഷണറുമായി നടത്തിയ കൂടിക്കാഴ്ചയ്ക്ക് ശേഷമാണ് അദ്ദേഹം സർക്കാരിനും പോലീസിനും നേരെ വിമർശനം ഉന്നയിച്ചത്.