ഓസ്ട്രേലിയക്കെതിരായ ഏകദിന പരമ്പരയിൽ ഇന്ത്യയുടെ സൂപ്പർ താരം വിരാട് കോഹ്‌ലിക്ക് തുടർച്ചയായി രണ്ടാം മത്സരത്തിലും നിരാശയായിരുന്നു ഫലം. അഡ്‌ലെയ്ഡിൽ നടന്ന രണ്ടാം ഏകദിനത്തിൽ വെറും നാല് പന്തുകൾ നേരിട്ട കോഹ്‌ലി, സേവ്യർ ബാർട്ട്ലെറ്റിൻ്റെ പന്തിൽ എൽ.ബി.ഡബ്ല്യുവിൽ കുടുങ്ങി പൂജ്യത്തിന് പുറത്തായി. പെർത്തിൽ നടന്ന ആദ്യ ഏകദിനത്തിലും താരം പൂജ്യത്തിന് മടങ്ങിയിരുന്നു. ഏകദിന കരിയറിൽ ആദ്യമായാണ് കോഹ്‌ലി തുടർച്ചയായ രണ്ട് മത്സരങ്ങളിൽ പൂജ്യത്തിന് പുറത്താകുന്നത്.
പൂജ്യത്തിന് പുറത്തായ ശേഷം തലകുനിച്ച് മടങ്ങിയ കോഹ്‌ലിയെ അഡ്‌ലെയ്ഡ് ഓവലിൽ തിങ്ങിനിറഞ്ഞ ആരാധകർ ഹർഷാരവത്തോടെയാണ് യാത്രയാക്കിയത്. ഇതിനോട് പ്രതികരിച്ച കോഹ്‌ലി തൻ്റെ കയ്യിലെ ഗ്ലൗസ് ഉയർത്തി കാണികളെ അഭിവാദ്യം ചെയ്ത ശേഷമാണ് ഡ്രെസ്സിങ് റൂമിലേക്ക് മടങ്ങിയത്. സാധാരണയായി, പൂജ്യത്തിന് പുറത്താകുന്ന ഒരു ബാറ്റ്സ്മാൻ ആരാധകരെ നോക്കി കൈവീശി കാണിക്കുന്ന പതിവില്ലാത്തതിനാൽ, കോഹ്ലിയുടെ ഈ പ്രവൃത്തി പല ഊഹാപോഹങ്ങൾക്കും വഴി തുറന്നു.
ഈ സംഭവം സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചു. ഇത് താരത്തിൻ്റെ വിരമിക്കലിൻ്റെ സൂചനയാണോ എന്നാണ് ആരാധകർ പ്രധാനമായും സംശയം ഉന്നയിക്കുന്നത്. തൻ്റെ പ്രിയപ്പെട്ട ഗ്രൗണ്ടിലെ അവസാന മത്സരത്തിന് ശേഷമുള്ള മടക്കമായതുകൊണ്ടാകാം കോഹ്‌ലി ഇങ്ങനെ ചെയ്തതെന്നും, അതല്ലെങ്കിൽ ക്രിക്കറ്റിൽനിന്നുള്ള അദ്ദേഹത്തിൻ്റെ വിടവാങ്ങലിൻ്റെ സൂചനയാകാം ഇതെന്നും ആരാധകർ അഭിപ്രായപ്പെട്ടു.