ജാഫർ ഇടുക്കിയെ ടൈറ്റിൽ കഥാപാത്രമായി അവതരിപ്പിക്കുന്ന ചിത്രമാണ് ‘ആമോസ് അലക്സാണ്ടർ’. ഇപ്പോഴിതാ ചിത്രത്തിൻ്റെ ട്രെയിലർ റിലീസായിരിക്കുകയാണ്. അജയ് ഷാജി കഥയെഴുതി സംവിധാനം ചെയ്യുന്ന ചിത്രത്തിൽ അജു വർഗീസും ഒരു പ്രധാന കഥാപാത്രത്തിൽ എത്തുന്നുണ്ട്. മഞ്ചാടി ക്രിയേഷൻസിന്റെ ബാനറിൽ അഷറഫ് പിലാക്കലാണ് ചിത്രം നിർമ്മിക്കുന്നത്. ആമോസ് അലക്സാണ്ടർ എന്ന അസാധാരണ കഥാപാത്രത്തിലൂടെ ജാഫർ ഇടുക്കിയുടെ അഭിനയ ജീവിതത്തിലെ ഗ്രാഫ് ഉയരുമെന്ന പ്രതീക്ഷയിലാണ് അണിയറപ്രവർത്തകർ.
“ഞാനൊരു പ്രവാചകനല്ല… പ്രവാചക പുത്രനുമല്ല… ഞാൻ ഒരു ആട്ടിടയൻ ആകുന്നു” എന്ന ജാഫർ ഇടുക്കിയുടെ ശക്തമായ ഡയലോഗോടെയാണ് ‘ആമോസ് അലക്സാണ്ടർ’ എന്ന ചിത്രത്തിന്റെ ട്രെയിലർ ആരംഭിക്കുന്നത്. നടൻ ടൊവിനോ തോമസാണ് ഈ ട്രെയിലർ തൻ്റെ സോഷ്യൽ മീഡിയ ഹാൻഡിൽസിലൂടെ ട്രെയ്ലർ പുറത്തിറക്കിയത്. പൂർണ്ണമായും ഡാർക്ക് ക്രൈം ത്രില്ലർ ജോണറിൽ അജയ് ഷാജി കഥയെഴുതി സംവിധാനം ചെയ്ത് മഞ്ചാടി ക്രിയേഷൻസിൻ്റെ ബാനറിൽ അഷറഫ് പിലാക്കൽ നിർമ്മിച്ച ഈ ചിത്രം നവംബർ 14-ന് തീയേറ്ററുകളിൽ എത്തും.
ചിത്രത്തിൽ ഒരു മീഡിയ പ്രവർത്തകനായാണ് അജു വർഗീസ് എത്തുന്നത്. ഇയാളുടെ മാധ്യമപ്രവർത്തനത്തിനിടയിൽ ആമോസ് അലക്സാണ്ടറെ കണ്ടുമുട്ടുന്നതും തുടർന്നുണ്ടാകുന്ന സംഭവങ്ങളുമാണ് സിനിമയുടെ ഇതിവൃത്തം. അതിശക്തവും അസാധാരണവുമായ ആമോസ് അലക്സാണ്ടർ എന്ന ടൈറ്റിൽ കഥാപാത്രത്തെ അതിഗംഭീരമായ ഡയലോഗുകളിലൂടെയാണ് ജാഫർ ഇടുക്കി അവതരിപ്പിക്കുന്നത്. പ്രശസ്ത മോഡലും സ്റ്റേജ് ആർട്ടിസ്റ്റുമായ താര അമല ജോസഫാണ് ചിത്രത്തിലെ നായിക. മാധ്യമപ്രവർത്തകയായ നായികയുടെ വിവിധ സംസ്ഥാനങ്ങളിലൂടെയുള്ള അന്വേഷണ യാത്രയും ട്രെയിലറിൽ കാണാം. 14 സംസ്ഥാനങ്ങളിലൂടെയുള്ള യാത്രയും അവിടത്തെ കാഴ്ചകളും ചിത്രത്തിന് ദൃശ്യവിരുന്നേകുന്നു.