ചെറുപ്പത്തിലെ വിവാഹം വേണ്ടെന്നും സ്ത്രീകൾ ജീവിതം ആസ്വദിച്ചും അറിഞ്ഞും വളർന്ന ശേഷം മാത്രമേ വിവാഹത്തെ ക്കുറിച്ച് ചിന്തിക്കാവൂ എന്ന് ബോളിവുഡ് താരം മലൈക അറോറ. ഇന്ത്യ ടുഡേയ്ക്ക് നൽകിയ പ്രത്യേക അഭിമുഖത്തിലാണ് മലൈക തന്റെ ചെറുപ്പകാലത്തെ വിവാഹത്തെക്കുറിച്ചുള്ള അനുഭവങ്ങൾ പങ്കു വച്ചത്.
ചെറുപ്പത്തിൽ തന്നെ വിവാഹം കഴിക്കുക എന്ന തെറ്റ് ആവർത്തിക്കരുത്. ജീവിതം അനുഭവിച്ചറിയാൻ സ്ത്രീകൾ സമയം കണ്ടെത്തണം. ലോകത്തെ അറിയാനും സ്വന്തം വ്യക്തിത്വം തിരിച്ചറിയാനും ശ്രമിച്ച ശേഷം മാത്രം വിവാഹത്തെക്കുറിച്ച് ചിന്തിക്കുക,” മലൈക പറഞ്ഞു.തന്റെ 25-ാം വയസ്സിലായിരുന്നു മലൈകയും അർബാസ് ഖാനും തമ്മിലുള്ള വിവാഹം. ആ സമയത്ത് കുടുംബജീവിതത്തിന്റെ ഉത്തരവാദിത്തങ്ങൾ ഏറ്റെടുക്കാൻ താൻ പക്വത പ്രാപിച്ചിരുന്നില്ലെന്ന് മലൈക പറയുന്നു. “
വിവാഹത്തിന് മുൻപ് സ്ത്രീകൾ സാമ്പത്തികമായും വൈകാരികമായും സ്വതന്ത്രരാകേണ്ടത് അനിവാര്യമാണെന്ന് മലൈക ഊന്നിപ്പറഞ്ഞു. സ്വന്തം കാലിൽ നിന്ന ശേഷം ഒരു ബന്ധത്തിലേക്ക് പ്രവേശിക്കുന്നത് സ്ത്രീകൾക്ക് കൂടുതൽ ആത്മവിശ്വാസം നൽകുമെന്നും അവർ കൂട്ടിച്ചേർത്തു. എന്നാൽ നേരത്തെ വിവാഹിതയായത് കൊണ്ട് നേരത്തെ അമ്മയാകാൻ കഴിഞ്ഞതിനെ ജീവിതത്തിലെ മനോഹരമായ ഒന്നായിട്ടാണ് താരം കാണുന്നത്.
1998-ൽ വിവാഹിതരായ മലൈകയും അർബാസ് ഖാനും 19 വർഷത്തെ ദാമ്പത്യത്തിന് ശേഷം 2017-ലാണ് നിയമപരമായി വേർപിരിഞ്ഞത്. ഇവർക്ക് അർഹാൻ എന്നൊരു മകനുണ്ട്. അർബാസുമായുള്ള വേർപിരിയലിന് ശേഷം 2016 മുതൽ 2024 വരെ നടൻ അർജുൻ കപൂറുമായി മലൈക പ്രണയത്തിലായിരുന്നു.
വിവാഹമോചന സമയത്ത് സുഹൃത്തുക്കളിൽ നിന്നും ബന്ധുക്കളിൽ നിന്നും വലിയ രീതിയിലുള്ള വിമർശനങ്ങളും ജഡ്ജ്മെന്റും നേരിടേണ്ടി വന്നതായും മലൈക വെളിപ്പെടുത്തി. എങ്കിലും സ്വന്തം സന്തോഷത്തിന് മുൻഗണന നൽകാനുള്ള തീരുമാനത്തിൽ താൻ ഇന്നും ഉറച്ചുനിൽക്കുന്നുവെന്നും അവർ പറഞ്ഞു.
തന്റെ ദാമ്പത്യം പരാജയപ്പെട്ടെങ്കിലും ‘വിവാഹം’ എന്ന ആശയത്തിൽ തനിക്ക് ഇപ്പോഴും വിശ്വാസമുണ്ടെന്ന് മലൈക വ്യക്തമാക്കി. “ഞാൻ ഇപ്പോൾ വിവാഹത്തിനായി ആരെയും അന്വേഷിച്ചു നടക്കുന്നില്ല, എന്റെ ജീവിതത്തിൽ ഞാൻ സംതൃപ്തയാണ്. എങ്കിലും പ്രണയത്തിനോ പുതിയൊരു ബന്ധത്തിനോ ഞാൻ എതിരല്ല. ഭാവിയിൽ അനുയോജ്യമായ ഒരു സാഹചര്യം വന്നാൽ വീണ്ടും വിവാഹിതയാകുന്നതിനെക്കുറിച്ച് ആലോചിക്കും,” മലൈക പറഞ്ഞു.