യുഎഇയിൽ റോഡ് സുരക്ഷ വർധിപ്പിക്കുന്നതിൻ്റെ ഭാഗമായി പുതിയ ഫെഡറൽ ട്രാഫിക് നിയമം നിലവിൽ വന്നു. ഈ പുതിയ നിയമമനുസരിച്ച്, ഗുരുതരമായ ഗതാഗത കുറ്റകൃത്യങ്ങളിൽ ശിക്ഷിക്കപ്പെടുന്ന വാഹനമോടിക്കുന്നവരുടെ ലൈസൻസ് പരമാവധി മൂന്ന് വർഷം വരെ സസ്പെൻഡ് ചെയ്യാൻ വ്യവസ്ഥയുണ്ട്. രാജ്യത്തുടനീളം അപകടങ്ങൾ കുറയ്ക്കുന്നതിനുള്ള വിപുലമായ ശ്രമങ്ങളുടെ ഭാഗമായാണ് ഈ കർശന നടപടി.
സസ്പെൻഡ് ചെയ്ത ലൈസൻസുമായി വാഹനമോടിക്കുന്നവർക്ക് പുതിയ നിയമം കർശനമായ പിഴകളും ശിക്ഷകളും ഉറപ്പാക്കുന്നു. കോടതി, ലൈസൻസിംഗ് അതോറിറ്റി, അല്ലെങ്കിൽ ട്രാഫിക് എൻഫോഴ്‌സ്‌മെന്റ് ബോഡി എന്നിവ ഉത്തരവിട്ട സസ്പെൻഷൻ കാലയളവിൽ വാഹനം ഓടിക്കുന്നതായി കണ്ടെത്തിയാൽ, അവർക്ക് മൂന്ന് മാസം വരെ തടവോ, കുറഞ്ഞത് 10,000 ദിർഹം പിഴയോ, അല്ലെങ്കിൽ ഇവ രണ്ടും കൂടിയോ ശിക്ഷയായി ലഭിക്കാം.
മയക്കുമരുന്നോ മദ്യമോ ഉപയോഗിച്ചുള്ള ഡ്രൈവിംഗ്, അശ്രദ്ധമായതും അപകടകരവുമായ ഡ്രൈവിംഗ്, മറ്റുള്ളവരുടെ ജീവൻ അപകടപ്പെടുത്തുക തുടങ്ങിയ ഗുരുതരമായ കുറ്റകൃത്യങ്ങൾക്കാണ് ഈ നിയമം പ്രധാനമായും ബാധകമാവുക. യുഎഇയിലെ പുതിയ ഫെഡറൽ ട്രാഫിക് നിയമപ്രകാരം ഗുരുതരമായ ട്രാഫിക് നിയമലംഘനങ്ങൾക്ക് ലൈസൻസ് സംബന്ധിച്ച് കർശനമായ നടപടികളാണ് ഏർപ്പെടുത്തിയിരിക്കുന്നത്. നിയമലംഘനം നടത്തുന്നവരുടെ നിലവിലുള്ള ഡ്രൈവിംഗ് ലൈസൻസ് മൂന്ന് വർഷം വരെ സസ്പെൻഡ് ചെയ്യാനുള്ള വ്യവസ്ഥകൾ ഈ നിയമത്തിൽ ഉൾപ്പെടുത്തിയിട്ടുണ്ട്.
കൂടാതെ, സസ്പെൻഷൻ കാലാവധിക്ക് ശേഷം ലൈസൻസ് പുതുക്കുന്നതിനും നിയന്ത്രണങ്ങളുണ്ട്. ഗുരുതര കുറ്റകൃത്യങ്ങളിൽ ശിക്ഷിക്കപ്പെടുന്നവർക്ക് സസ്പെൻഷൻ കാലാവധി കഴിഞ്ഞാലും രണ്ട് വർഷം വരെ ലൈസൻസ് പുതുക്കാനുള്ള അവകാശം നിഷേധിക്കാം.
ലൈസൻസ് ഇല്ലാത്ത വ്യക്തിയാണ് നിയമലംഘനം നടത്തുന്നതെങ്കിൽ, പുതിയ നിയമപ്രകാരം മൂന്ന് വർഷം വരെ പുതിയ ലൈസൻസ് നേടുന്നതിൽ നിന്നും അവരെ വിലക്കും. ഈ സസ്പെൻഷൻ അല്ലെങ്കിൽ വിലക്ക് കാലയളവിൽ ഡ്രൈവിംഗ് ലൈസൻസ് പൂർണ്ണമായും അസാധുവായിരിക്കും എന്നും നിയമം വ്യക്തമാക്കുന്നു.