യദു ഫിലിം ഫാക്ടറിയുടെ ബാനറിൽ സുധീർ സി.ബി നിർമ്മിച്ച് ജീവ സംവിധാനം ചെയ്യുന്ന ‘ഇനിയും’ എന്ന ചിത്രം ഈ മാസം 27-ന് തിയറ്ററുകളിൽ പ്രദർശനത്തിനെത്തുന്നു. സനീഷ് മേലേപ്പാട്ട് നായകനാകുന്ന ചിത്രത്തിൽ പാർഥിപ് കൃഷ്ണനും ഒരു സുപ്രധാന വേഷത്തിൽ എത്തുന്നുണ്ട്. അഷ്കർ സൗദാൻ, രാഹുൽ മാധവ്, റിയാസ് ഖാൻ, കൈലാഷ്, ദേവൻ തുടങ്ങി മലയാളത്തിലെ വൻ താരനിര തന്നെ അണിനിരക്കുന്ന ഈ ചിത്രം ഒരു ഗ്രാമീണ പശ്ചാത്തലത്തിലുള്ള ഫാമിലി എന്റർടെയ്നറാണ്.
കുടുംബ ബന്ധങ്ങൾക്ക് ഏറെ പ്രാധാന്യം നൽകുന്ന സിനിമയുടെ കഥയും തിരക്കഥയും നിർമ്മാതാവായ സുധീർ സി.ബി തന്നെയാണ് തയ്യാറാക്കിയിരിക്കുന്നത്. കനകരാജ് ഛായാഗ്രഹണം നിർവ്വഹിക്കുന്ന ചിത്രത്തിന് സംഗീതം പകരുന്നത് മോഹൻ സിത്താര, സജീവ് കണ്ടര്, പി.ഡി. തോമസ് എന്നിവർ ചേർന്നാണ്. ഏങ്ങണ്ടിയൂർ ചന്ദ്രശേഖരൻ ഉൾപ്പെടെയുള്ളവരുടെ വരികൾക്ക് മോഹൻ സിത്താരയുടേതാണ് പശ്ചാത്തല സംഗീതം.
സ്ഫടികം ജോർജ്, വിജി തമ്പി, സുനിൽ സുഖദ, ചാർമിള തുടങ്ങി നീണ്ടൊരു താരനിരയുടെ സാന്നിധ്യവും ചിത്രത്തിന്റെ പ്രത്യേകതയാണ്. എ.എസ് ദിനേശ് ആണ് പി.ആർ.ഒ. കുടുംബപ്രേക്ഷകരെ ലക്ഷ്യം വെച്ചെത്തുന്ന ഈ ചിത്രം ഫെബ്രുവരി അവസാന വാരം തിയറ്ററുകളിൽ സജീവമാകുമെന്നാണ് അണിയറപ്രവർത്തകരുടെ പ്രതീക്ഷ.