ജയസൂര്യയെ നായകനാക്കി റോജിൻ തോമസ് സംവിധാനം ചെയ്യുന്ന ‘കത്തനാർ: ദി വൈൽഡ് സോഴ്സറർ’ എന്ന ചിത്രത്തിന്റെ ടീസർ ട്രെയ്ലർ മാർച്ച് 31-ന് റിലീസ് ചെയ്യും. ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലൻ നിർമ്മിക്കുന്ന ഈ ചിത്രം മലയാള സിനിമയിലെ തന്നെ ഏറ്റവും വലിയ പ്രൊജക്റ്റുകളിൽ ഒന്നായാണ് വിലയിരുത്തപ്പെടുന്നത്. ആർ. രാമാനന്ദും റോജിൻ തോമസും ചേർന്ന് തിരക്കഥയൊരുക്കിയ ഈ ബ്രഹ്മാണ്ഡ ചിത്രത്തിന്റെ പോസ്റ്റ് പ്രൊഡക്ഷൻ ജോലികൾ ഇപ്പോൾ അതിവേഗം പുരോഗമിക്കുകയാണ്.
ദേശീയ പുരസ്കാരം നേടിയ ‘ഹോം’ എന്ന ചിത്രത്തിന് ശേഷം റോജിൻ തോമസ് ഒരുക്കുന്ന ഈ ദൃശ്യവിസ്മയത്തിൽ വൻ താരനിരയാണ് അണിനിരക്കുന്നത്. ടൈറ്റിൽ വേഷം ചെയ്യുന്ന ജയസൂര്യയ്ക്കൊപ്പം തെന്നിന്ത്യൻ സൂപ്പർ താരം അനുഷ്ക ഷെട്ടി, പ്രഭുദേവ, വിനീത് തുടങ്ങിയ പ്രമുഖർ പ്രധാന വേഷങ്ങളിലെത്തുന്നു. വെർച്വൽ പ്രൊഡക്ഷൻ ഉൾപ്പെടെയുള്ള ലോകോത്തര സാങ്കേതികവിദ്യകൾ ഉപയോഗിച്ചാണ് ചിത്രം ചിത്രീകരിച്ചിരിക്കുന്നത് എന്നത് ഇതിനോടകം വലിയ ചർച്ചയായിട്ടുണ്ട്.
മലയാളത്തിന് പുറമെ തമിഴ്, തെലുങ്ക്, ഹിന്ദി ഉൾപ്പെടെ 15 ഭാഷകളിലായാണ് ചിത്രം തിയേറ്ററുകളിലെത്തുന്നത്. ബൈജു ഗോപാലൻ, വി.സി. പ്രവീൺ എന്നിവർ സഹനിർമ്മാതാക്കളായ ഈ ചിത്രം മലയാള സിനിമയെ ആഗോളതലത്തിൽ മറ്റൊരു ഉയരത്തിൽ എത്തിക്കുമെന്നാണ് സിനിമാപ്രേമികളുടെ പ്രതീക്ഷ. ചിത്രത്തിന്റെ ഫസ്റ്റ് ലുക്കും മുൻപ് പുറത്തിറങ്ങിയ ഗ്ലിംപ്സ് വീഡിയോയും ഇതിനോടകം തന്നെ വലിയ തരംഗം സൃഷ്ടിച്ചിരുന്നു.