അബുദാബി റോഡുകളിൽ ഇന്ന് വാഹനമോടിക്കുന്നവർ കൂടുതൽ ജാഗ്രത പാലിക്കണമെന്ന് കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. ചില പ്രദേശങ്ങളിൽ കനത്ത മൂടൽമഞ്ഞിന് സാധ്യതയുണ്ടെന്നാണ് പ്രവചനം.
ഈ പ്രദേശങ്ങളിൽ കാഴ്ചാപരിധി കുറവായതിനാൽ ദേശീയ കാലാവസ്ഥാ നിരീക്ഷണ കേന്ദ്രം യെല്ലോ അലേർട്ട് പുറപ്പെടുവിച്ചിട്ടുണ്ട്.
റോഡ് സുരക്ഷ ഉറപ്പാക്കാൻ ഡ്രൈവർമാർ ശ്രദ്ധയോടെ വാഹനമോടിക്കണമെന്ന് അധികൃതർ നിർദ്ദേശിച്ചു. ഇന്ന് രാവിലെ അബുദാബിയിലെ വിവിധ പ്രദേശങ്ങളായ അർജാൻ, മദീനത്ത് സായിദ് (അൽ ദഫ്ര മേഖല), സ്വീഹാൻ എന്നിവിടങ്ങളിൽ മൂടൽമഞ്ഞ് അനുഭവപ്പെട്ടു.
കാലാവസ്ഥാ നിരീക്ഷണ കേന്ദ്രത്തിന്റെ പ്രവചനം അനുസരിച്ച്, രാജ്യത്തുടനീളം കാലാവസ്ഥ ഭാഗികമായി മേഘാവൃതമായിരിക്കുമെന്ന് പ്രതീക്ഷിക്കുന്നു. പ്രത്യേകിച്ച് ഖോർ ഫക്കാൻ, റാസൽ ഖൈമ, തെക്കൻ പ്രദേശങ്ങൾ, പ്രത്യേകിച്ച് അൽ ഐൻ എന്നിവയുൾപ്പെടെയുള്ള കിഴക്കൻ പ്രദേശങ്ങളിൽ ഉച്ചകഴിഞ്ഞ് സംവഹന മേഘങ്ങൾ രൂപപ്പെടാൻ സാധ്യതയുണ്ട്, ഇത് മഴയ്ക്ക് കാരണമാകും എന്നും മുന്നറിയിപ്പിൽ പറയുന്നുണ്ട്.