സൈനികർക്കും ഓഫീസർമാർക്കും സോഷ്യൽ മീഡിയ ഉപയോഗിക്കുന്നതിൽ ഏർപ്പെടുത്തിയിരുന്ന കർശന നിയന്ത്രണങ്ങളിൽ മാറ്റം വരുത്തി ഇന്ത്യൻ സൈന്യം. സൈനികർക്ക് ഇനി മുതൽ ഇൻസ്റ്റാഗ്രാം ഉപയോഗിക്കാം. എന്നാൽ, അവർക്ക് പോസ്റ്റ് ചെയ്യാനോ മറ്റു പോസ്റ്റുകളിൽ ലൈക്ക് ചെയ്യാനോ കമന്റ് ചെയ്യാനോ പാടില്ല എന്ന് മാത്രം.
സൈനികർക്ക് അവരുടെ സ്വന്തം അവബോധത്തിനും വിവരം ശേഖരിക്കുന്നതിനുമായാണ് നിയന്ത്രണത്തിൽ ഇളവ് വരുത്തിയത്. വ്യാജമോ തെറ്റിദ്ധരിപ്പിക്കുന്നതോ ആയ പോസ്റ്റുകൾ മുതിർന്ന ഉദ്യോഗസ്ഥരിലേക്ക് റിപ്പോർട്ട് ചെയ്യുവാൻ കൂടിയാണ് ഇളവ്. എല്ലാ സൈനിക യൂണിറ്റുകൾക്കും വകുപ്പുകൾക്കും ഈ നിർദേശങ്ങൾ നൽകിയതായും വൃത്തങ്ങൾ അറിയിച്ചു.
2019 ൽ സോഷ്യൽ മീഡിയ ഗ്രൂപ്പുകളിൽ അംഗമാകുന്നതിൽ നിന്ന് സൈനികരെ വിലക്കിയിരുന്നു. പിന്നീട് 2020ൽ സുരക്ഷാ കാരണങ്ങളാൽ ഫേസ്ബുക്കും ഇൻസ്റ്റഗ്രാമും ഉൾപ്പെടെ 89 മൊബൈൽ ആപ്പുകൾ ഫോണുകളിൽ നിന്ന് നീക്കം ചെയ്യാനും ഉത്തരവിട്ടിരുന്നു.
സൈന്യത്തിന് ഇതിനകം തന്നെ സ്വന്തമായി ഔദ്യോഗിക സോഷ്യൽ മീഡിയ അക്കൗണ്ടുകൾ ഉണ്ട്. പുതിയ മാർഗനിർദേശങ്ങൾ അനുസരിച്ച്, സൈനികർക്ക് ഇപ്പോൾ പൊതുവായ വിവരങ്ങൾക്കായി ഈ പ്ലാറ്റ്ഫോമുകൾ ഉപയോഗിക്കാം. വിവരങ്ങൾ ശേഖരിക്കുന്നതിനും, അവരുടെ റെസ്യൂമെകൾ അപ്ലോഡ് ചെയ്യുന്നതിനും, പ്രൊഫഷണൽ അവസരങ്ങൾ തേടുന്നതിനും അവർക്ക് സാധിക്കും. എന്നാൽ എല്ലാ സുരക്ഷാ പ്രോട്ടോക്കോളുകളും കർശനമായി പാലിക്കേണ്ടത് നിർബന്ധമാണ്.