ഇന്ത്യൻ പ്രീമിയർ ലീഗിലെ ഏറ്റവും വലിയ ആരാധകബലമുള്ള ടീമായ ചെന്നൈ സൂപ്പർ കിങ്‌സ് (CSK) ക്യാപ്റ്റൻ മഹേന്ദ്ര സിംഗ് ധോണിയുടെ കളി തുടരുന്നതിനെക്കുറിച്ച് വ്യക്തമായ സൂചന നൽകി. അടുത്ത ഐപിഎൽ സീസണിലും സൂപ്പർ താരം ധോണി കളിക്കുമെന്ന് സിഎസ്‌കെ സിഇഒ കാശി വിശ്വനാഥൻ അറിയിച്ചു. അടുത്ത കിരീട വിജയത്തിനായി ചെന്നൈ സൂപ്പർ കിങ്‌സ് പരമാവധി ശ്രമിക്കുമെന്നും അദ്ദേഹം വ്യക്തമാക്കി.
അടുത്ത സീസണിലും മഞ്ഞക്കുപ്പായത്തിൽ
പ്രൊവോക്ക് ലൈഫ്സ്റ്റൈൽ ഇൻസ്റ്റാഗ്രാമിൽ പങ്കുവെച്ച ഒരു വീഡിയോയിലാണ് കാശി വിശ്വനാഥൻ്റെ നിർണ്ണായക വെളിപ്പെടുത്തൽ. അടുത്ത ഐപിഎൽ കളിക്കുമ്പോൾ ധോണിക്ക് 44 വയസ് തികയും. ധോണി വിരമിക്കുമോ എന്ന ഒരു കുട്ടിയുടെ ചോദ്യത്തിന് മറുപടിയായി സിഎസ്‌കെ സിഇഒ ഇങ്ങനെ പറഞ്ഞു: “ഇല്ല, ധോണി വിരമിക്കില്ല.”
എന്നാൽ, ധോണി എന്നാണ് വിരമിക്കുകയെന്ന ചോദ്യം ആവർത്തിച്ചപ്പോൾ, “ഈക്കാര്യം ധോണിയോട് ചോദിച്ചിട്ട് മറുപടി പറയാം” എന്നായിരുന്നു കാശി വിശ്വനാഥൻ്റെ മറുപടി. ധോണി ആരാധകർക്ക് വലിയ ആശ്വാസവും ആവേശവും നൽകുന്നതാണ് സിഎസ്‌കെ മേധാവിയുടെ ഈ വാക്കുകൾ.
അടുത്ത വർഷം ഐപിഎൽ കിരീടം നേടാൻ പദ്ധതിയുണ്ടോ എന്ന കുട്ടിയുടെ ആദ്യ ചോദ്യത്തിനും കാശി വിശ്വനാഥൻ മറുപടി നൽകി. “തീർച്ചയായും ഞങ്ങൾ തയ്യാറാണ്. എന്നാൽ കിരീടനേട്ടം സ്വന്തമാക്കാൻ കഴിയുമോയെന്ന് അറിയില്ല. എങ്കിലും പരമാവധി ശ്രമിക്കും,” അദ്ദേഹം പ്രതികരിച്ചു.
അടുത്ത സീസണിന് മുന്നോടിയായി ചെന്നൈ സൂപ്പർ കിങ്‌സ് ടീമിലെത്തിക്കാൻ തയ്യാറെടുക്കുന്ന താരങ്ങളെക്കുറിച്ചുള്ള ചോദ്യത്തിന്, ഐപിഎൽ ലേലത്തിൽ ആരൊക്കെ എത്തുമെന്ന് അറിഞ്ഞ ശേഷം മാത്രമേ ടീം തീരുമാനം എടുക്കൂ എന്നും സിഇഒ വ്യക്തമാക്കി. നിലവിൽ ധോണിയുടെ കായികക്ഷമതയും ഫിറ്റ്നസ്സും മികച്ച നിലയിലായതിനാൽ, അടുത്ത സീസണിലും അദ്ദേഹത്തെ കളിക്കളത്തിൽ മഞ്ഞ ജേഴ്സിയിൽ കാണാൻ കഴിയുമെന്ന പ്രതീക്ഷയിലാണ് സിഎസ്‌കെ ആരാധകർ.