സംസ്ഥാനത്ത് തെക്കൻ കേരളത്തിലും മധ്യകേരളത്തിലും ഇന്നും നാളെയും മഴ കനക്കാൻ സാധ്യതയുണ്ടെന്ന് മുന്നറിയിപ്പ്. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശ്ശൂർ എന്നീ എട്ട് ജില്ലകളിൽ ഇന്നും നാളെയും യെല്ലോ അലർട്ട് പ്രഖ്യാപിച്ചു. കേരള, കർണാടക, ലക്ഷദ്വീപ് തീരങ്ങളിൽ മത്സ്യബന്ധനത്തിന് വിലക്കേർപ്പെടുത്തിയിട്ടുണ്ട്.
മൂന്നാറിൽ വീണ്ടും മണ്ണിടിച്ചിൽ
സംസ്ഥാനത്ത് കനത്ത മഴ തുടരുന്നതിനിടെ കൊച്ചി-ധനുഷ്‌കോടി ദേശീയപാതയിൽ വീണ്ടും മണ്ണിടിഞ്ഞു. മൂന്നാർ പള്ളിവാസൽ മൂലക്കട ഭാഗത്താണ് മണ്ണിടിഞ്ഞ് ഗതാഗത തടസ്സമുണ്ടായത്. കരാർ കമ്പനിയുടെ അശാസ്ത്രീയമായ നിർമ്മാണമാണ് ഈ പ്രശ്‌നങ്ങൾക്ക് കാരണമെന്ന് നാട്ടുകാർ ആരോപിക്കുന്നു.
മോൻത ചുഴലിക്കാറ്റ് ആന്ധ്രാ തീരത്തേക്ക്
അതേസമയം, മോൻത ചുഴലിക്കാറ്റ് കരുത്താർജിച്ച് ആന്ധ്രാ തീരത്തേക്ക് അടുക്കുകയാണ്. മണിക്കൂറിൽ 110 കിലോമീറ്റർ വേഗതയിൽ രാത്രിയോടെ ചുഴലിക്കാറ്റ് കര തൊട്ടേക്കും. ആന്ധ്ര, തെക്കൻ ഒഡീഷ, തമിഴ്‌നാട് തീരങ്ങളിൽ അതീവ ജാഗ്രതാ നിർദേശം നൽകി പതിനായിരക്കണക്കിന് ആളുകളെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിച്ചു. ട്രെയിൻ, വിമാന സർവീസുകൾ റദ്ദാക്കിയിട്ടുണ്ട്. കേന്ദ്രസർക്കാർ സ്ഥിതിഗതികൾ സസൂക്ഷ്മം വിലയിരുത്തുന്നുണ്ട്.