എൻഎസ്എസ് എന്നും ഉയർത്തിപ്പിടിക്കുന്നത് മതേതര നിലപാടാണെന്നും വർഗീയതയോട് അവർ ഒരിക്കലും ഒത്തുതീർപ്പ് നടത്തിയിട്ടില്ലെന്നും പി.കെ. കുഞ്ഞാലിക്കുട്ടി പറഞ്ഞു. ‘സമദൂരം’ എന്ന കൃത്യമായ രാഷ്ട്രീയ നയം പിന്തുടരുന്ന എൻഎസ്എസ്, അടുത്തിടെ നടന്ന സാമുദായിക ഐക്യനീക്കങ്ങൾക്ക് പിന്നിലെ രാഷ്ട്രീയ ലക്ഷ്യങ്ങൾ തിരിച്ചറിഞ്ഞാണ് അതിൽ നിന്നും പിന്മാറിയതെന്ന് അദ്ദേഹം വ്യക്തമാക്കി.
എസ്എൻഡിപിയും മുൻപ് സമാനമായ നിലപാടാണ് സ്വീകരിച്ചിരുന്നതെങ്കിലും പിന്നീട് അതിൽ മാറ്റം സംഭവിച്ചതായി കുഞ്ഞാലിക്കുട്ടി ചൂണ്ടിക്കാട്ടി. രാഷ്ട്രീയ നേട്ടങ്ങൾക്കായി സാമുദായിക സംഘടനകളെ ഉപയോഗിക്കാനുള്ള ശ്രമങ്ങൾ എൻഎസ്എസ് തിരിച്ചറിഞ്ഞത് സ്വാഗതാർഹമാണെന്നും കോഴിക്കോട്ട് മാധ്യമങ്ങളോട് സംസാരിക്കവെ അദ്ദേഹം കൂട്ടിച്ചേർത്തു.