വൺപ്ലസ് 15 സീരീസിന്റെ വിജയത്തിന് പിന്നാലെ സ്മാർട്ട്ഫോൺ വിപണിയെ ഞെട്ടിക്കാൻ പുതിയ ‘ടർബോ’ കരുത്തുമായി വൺപ്ലസ് എത്തുന്നു. 9,000mAh ബാറ്ററിയും സ്നാപ്ഡ്രാഗൺ പ്രോസസറുമടങ്ങുന്ന ഈ പുതിയ ഉപകരണം വൺപ്ലസിന്റെ ആദ്യ ‘ടർബോ’ മോഡലോ അല്ലെങ്കിൽ പുതിയ ‘നോർഡ്’ സീരീസോ ആകാൻ സാധ്യതയുണ്ടെന്നാണ് പുറത്തുവരുന്ന റിപ്പോർട്ടുകൾ.
പ്രമുഖ ടിപ്സ്റ്റർ അഭിഷേക് യാദവ് എക്സിലൂടെ പങ്കുവെച്ച വിവരങ്ങൾ പ്രകാരം, “ഫോക്സ്വാഗൺ”എന്ന കോഡ് നാമത്തിലാണ് വൺപ്ലസ് ഈ പുതിയ ഉപകരണം വികസിപ്പിക്കുന്നത്. വൺപ്ലസ് 15, 15R എന്നീ മോഡലുകൾക്ക് താഴെയായിരിക്കും ഇതിന്റെ സ്ഥാനം. ആഗോള വിപണിയിലും ഇന്ത്യയിലും ഒരേസമയം ഈ ഫോൺ എത്തുമെന്നാണ് പ്രതീക്ഷിക്കുന്നത്.
പ്രതീക്ഷിക്കുന്ന പ്രധാന സവിശേഷതകൾ
ബാറ്ററിയും ചാർജിംഗും: വിപണിയിലെ മറ്റു ഫോണുകളെ നിഷ്പ്രഭമാക്കുന്ന 9,000mAh ബാറ്ററിയാണ് ഇതിന്റെ പ്രധാന ആകർഷണം. ഇതിനൊപ്പം 80W ഫാസ്റ്റ് ചാർജിംഗ് പിന്തുണയും ഉണ്ടാകും.
പ്രോസസ്സർ: ഏറ്റവും പുതിയ സ്നാപ്ഡ്രാഗൺ 8s Gen 4 ചിപ്സെറ്റും 12 ജിബി വരെ റാമും ഫോണിന് കരുത്തേകും.
ഡിസ്പ്ലേ: 165Hz റിഫ്രഷ് റേറ്റുള്ള 6 ഇഞ്ച് OLED ഡിസ്പ്ലേ. ഗെയിമിംഗിനും വീഡിയോകൾക്കും മികച്ച അനുഭവം ഇത് നൽകും.
ക്യാമറ: വൺപ്ലസ് 15R-ന് സമാനമായ ഡ്യുവൽ റിയർ ക്യാമറ സിസ്റ്റം.
ചൈനീസ് വിപണിയിലെ ‘ഏസ്’ (Ace) സീരീസ് പോലെ ഇന്ത്യയിൽ ഇത് പുതിയൊരു ‘ടർബോ’ സീരീസായോ അല്ലെങ്കിൽ വരാനിരിക്കുന്ന ‘നോർഡ്’ ഫോണായോ അവതരിപ്പിക്കാനാണ് കമ്പനി ആലോചിക്കുന്നത്. ഫ്ലാഗ്ഷിപ്പ് ഫോണുകളുടെ ഫീച്ചറുകൾ കുറഞ്ഞ വിലയിൽ ലഭ്യമാക്കുക എന്ന തന്ത്രമാണ് വൺപ്ലസ് ഇവിടെയും പയറ്റുന്നത്.