യമഹയുടെ ജനപ്രിയ സ്കൂട്ടറായ ഫാസിനോ 125 Fi ഹൈബ്രിഡ് പുത്തൻ മാറ്റങ്ങളുമായി വിപണിയിലെത്തി. യുവാക്കളുടെ പ്രിയപ്പെട്ട സ്കൂട്ടറായ ഫാസിനോയുടെ പുതിയ പതിപ്പിന് 76,500 രൂപയാണ് പ്രാരംഭ എക്സ്ഷോറൂം വില. റീഡിസൈൻ ചെയ്ത പിൻഭാഗവും പുതിയ ഡിസൈനിലുള്ള ടെയിൽലൈറ്റും ഇൻഡിക്കേറ്ററുകളുമാണ് പ്രധാന ആകർഷണം.
രൂപകൽപ്പനയിലെ മാറ്റങ്ങൾ
സ്കൂട്ടറിന്റെ മൊത്തത്തിലുള്ള നീളം 1780 മില്ലീമീറ്ററായി കുറച്ചത് കനത്ത ട്രാഫിക്കിലും ഇടുങ്ങിയ റോഡുകളിലും വാഹനം അനായാസം കൈകാര്യം ചെയ്യാൻ സഹായിക്കും. മുൻവശത്തെ ഭംഗി വർധിപ്പിക്കാൻ പുതിയ ഡെക്കലുകളും ഡിസൈൻ മാറ്റങ്ങളും യമഹ ഉൾപ്പെടുത്തിയിട്ടുണ്ട്. ഈ പരിഷ്കാരങ്ങൾ ഒഴിച്ചുനിർത്തിയാൽ സ്കൂട്ടറിന്റെ ക്ലാസിക് ഡിസൈൻ മുൻ മോഡലിന് സമാനമായി തുടരുന്നു.
എൻജിനും കരുത്തും
നേരത്തെയുണ്ടായിരുന്ന അതേ 125 സിസി, എയർ-കൂൾഡ്, സിംഗിൾ-സിലിണ്ടർ എൻജിൻ തന്നെയാണ് പുതിയ പതിപ്പിലും കരുത്ത് പകരുന്നത്. ഇത് 8 bhp പവറും 10.3 Nm ടോർക്കും ഉത്പാദിപ്പിക്കുന്നു.
വിവിധ വേരിയന്റുകളും വിലയും
വിവിധ നിറങ്ങളിലും ഫീച്ചറുകളിലും മൂന്ന് വേരിയന്റുകളിലായാണ് ഫാസിനോ ലഭ്യമാകുന്നത്.
ഫാസിനോ ഡ്രം : വിവിഡ് റെഡ്, മെറ്റാലിക് ബ്ലാക്ക്, മെറ്റാലിക് വൈറ്റ് നിറങ്ങളിൽ ലഭ്യമാണ്. വില: 76,500.
ഫാസിനോ ഡിസ്ക് : കൂൾ ബ്ലൂ മെറ്റാലിക്, മെറ്റാലിക് ലൈറ്റ് ഗ്രീൻ, ഡാർക്ക് മാറ്റ് ബ്ലൂ നിറങ്ങളിൽ ലഭിക്കുന്നു. വില: 88,000.
ഫാസിനോ എസ് : മാറ്റ് ഗ്രേ, മാറ്റ് ബ്ലാക്ക് നിറങ്ങളിൽ ലഭിക്കുന്ന പ്രീമിയം മോഡൽ. വില: 95,200.
നൂതന ഫീച്ചറുകൾ
പ്രീമിയം മോഡലായ ഫാസിനോ ‘എസ്’-ൽ അത്യാധുനികമായ കളർ ടിഎഫ്ടി ഇൻസ്ട്രുമെന്റ് ക്ലസ്റ്ററാണ് നൽകിയിരിക്കുന്നത്. ഇതിനുപുറമെ ടേൺ-ബൈ-ടേൺ നാവിഗേഷൻ, ആൻസർ ബാക്ക് ഫങ്ഷൻ എന്നീ കണക്റ്റിവിറ്റി ഫീച്ചറുകളും വാഹനത്തിലുണ്ട്. 21 ലിറ്റർ അണ്ടർ സീറ്റ് സ്റ്റോറേജും സൈഡ് സ്റ്റാൻഡ് എൻജിൻ കട്ട് ഓഫും യാത്രക്കാർക്ക് കൂടുതൽ സൗകര്യവും സുരക്ഷയും ഉറപ്പാക്കുന്നു.