‘മെസിയുടെ ദൗർബല്യം ഇംഗ്ലണ്ട് ഉപയോഗപ്പെടുത്തണം’; വെയ്ൻ റൂണിയുടെ മുന്നറിയിപ്പ്

ലോകകപ്പ് ഫുട്ബോളിന്റെ രണ്ടാം സെമിഫൈനലിൽ നിലവിലെ ചാമ്പ്യന്മാരായ അർജന്റീനയും ഇംഗ്ലണ്ടും തമ്മിൽ ഏറ്റുമുട്ടുമ്പോൾ ഫുട്ബോൾ ലോകം ആകാംക്ഷയിലാണ്. തന്റെ കരിയറിൽ ആദ്യമായാണ് ലയണൽ മെസ്സി ഇംഗ്ലണ്ടിനെതിരെ കളിക്കാനൊരുങ്ങുന്നത്. ഈ നിർണ്ണായക മത്സരത്തിന് മുന്നോടിയായി മെസ്സിയെ എങ്ങനെ നേരിടാം എന്നതിനെക്കുറിച്ച് മുൻ ഇംഗ്ലീഷ് ഇതിഹാസ താരം വെയ്ൻ റൂണി തന്റെ അഭിപ്രായം പങ്കുവെച്ചു.

മെസ്സി പ്രതിരോധത്തിൽ വലിയ പങ്കുവഹിക്കുന്നില്ല എന്നതാണ് അർജന്റീനയുടെ ബലഹീനതയെന്നും, ഇംഗ്ലണ്ട് ഇത് കൃത്യമായി മുതലെടുക്കണമെന്നുമാണ് റൂണി ബിബിസി സ്പോർട്ടിനോട് വ്യക്തമാക്കിയത്. മെസ്സി പ്രതിരോധത്തിലേക്ക് ഇറങ്ങി വരാറില്ലെങ്കിലും, ജൂഡ് ബെല്ലിങ്ഹാമിനെപ്പോലെ ഏത് നിമിഷവും മത്സരത്തിന്റെ ഗതിമാറ്റാൻ കഴിയുന്ന മാന്ത്രികത അദ്ദേഹത്തിനുണ്ടെന്നും അതിനാൽ മെസ്സിയെ മാർക്ക് ചെയ്യുന്ന കാര്യത്തിൽ ഇംഗ്ലണ്ട് താരങ്ങൾ അതീവ ജാഗ്രത പുലർത്തണമെന്നും റൂണി കൂട്ടിച്ചേർത്തു.

ബുധനാഴ്ച രാത്രി 12.30-ന് അറ്റ്ലാന്റയിലാണ് ആവേശകരമായ ഈ മത്സരം നടക്കുന്നത്. മികച്ച ഫോമിലാണ് ഇരുടീമുകളും സെമിഫൈനലിലേക്ക് എത്തിയിരിക്കുന്നത്. നിലവിലെ ചാമ്പ്യന്മാരായ അർജന്റീന ഗ്രൂപ്പ് ഘട്ടത്തിൽ അൾജീരിയ, ഓസ്ട്രിയ, ജോർദാൻ എന്നിവരെ പരാജയപ്പെടുത്തിയാണ് തുടങ്ങിയത്. തുടർന്ന് റൗണ്ട് ഓഫ് 32-ൽ കേപ് വെർദെയെയും പ്രീക്വാർട്ടറിൽ ഈജിപ്തിനെയും ക്വാർട്ടറിൽ സ്വിറ്റ്സർലൻഡിനെയും തകർത്തുവിട്ടാണ് മെസ്സിയും സംഘവും സെമിയിലെത്തിയത്.

മറുവശത്ത്, ക്രൊയേഷ്യയെയും പാനമയെയും തോൽപ്പിക്കുകയും ഘാനയോട് സമനില വഴങ്ങുകയും ചെയ്ത ഇംഗ്ലണ്ട്, നോക്കൗട്ട് ഘട്ടത്തിൽ മികച്ച പ്രകടനമാണ് നടത്തിയത്. റൗണ്ട് ഓഫ് 32-ൽ കോംഗോയെയും പ്രീക്വാർട്ടറിൽ മെക്സിക്കോയെയും ക്വാർട്ടറിൽ നോർവെയെയും അനായാസം മറികടന്നാണ് ഇംഗ്ലണ്ട് സെമിഫൈനൽ ബർത്ത് ഉറപ്പിച്ചത്.