കേരളത്തിന്റെ പുതിയ മുഖ്യമന്ത്രിയായി യു.ഡി.എഫ് നേതാവ് വി.ഡി. സതീശനും 21 അംഗ മന്ത്രിസഭയും ഇന്ന് സത്യപ്രതിജ്ഞ ചെയ്ത് അധികാരമേൽക്കും. തിരുവനന്തപുരം സെൻട്രൽ സ്റ്റേഡിയത്തിൽ നടക്കുന്ന ചരിത്രപ്രധാനമായ ഈ ചടങ്ങിൽ പങ്കെടുക്കാൻ സംസ്ഥാനത്തിന്റെ വിവിധ ഭാഗങ്ങളിൽ നിന്നും വലിയ തോതിലുള്ള ജനപ്രവാഹമാണ് തലസ്ഥാനത്തേക്ക് എത്തിക്കൊണ്ടിരിക്കുന്നത്. ജനബാഹുല്യം കണക്കിലെടുത്ത് നഗരത്തിലും പരിസര പ്രദേശങ്ങളിലും വിപുലമായ സുരക്ഷാ ക്രമീകരണങ്ങളാണ് പോലീസ് ഒരുക്കിയിട്ടുള്ളത്.
ദേശീയ-പ്രാദേശിക രാഷ്ട്രീയത്തിലെ പ്രമുഖ നേതാക്കളുടെ വൻ നിരയാണ് സത്യപ്രതിജ്ഞാ ചടങ്ങിന് സാക്ഷ്യം വഹിക്കാൻ എത്തുന്നത്. എ.ഐ.സി.സി അധ്യക്ഷൻ മല്ലികാർജുൻ ഖാർഗെ, ലോക്സഭാ പ്രതിപക്ഷ നേതാവ് രാഹുൽ ഗാന്ധി, പ്രിയങ്ക ഗാന്ധി എന്നിവർ ചടങ്ങിൽ നേരിട്ട് പങ്കെടുക്കും. ഇവർക്ക് പുറമേ പ്രമുഖ കോൺഗ്രസ് നേതാക്കളും ചടങ്ങിന്റെ ഭാഗമാകും.
നിയമസഭാ തിരഞ്ഞെടുപ്പിൽ യു.ഡി.എഫ് നേടിയ ഉജ്ജ്വല വിജയത്തിന് ശേഷമുള്ള ഈ അധികാരമേൽക്കൽ ചടങ്ങ് പ്രതിപക്ഷ ഐക്യത്തിന്റെ കൂടി വേദിയായി മാറും. 24 മണിക്കൂറിനുള്ളിൽ തന്നെ മന്ത്രിമാരുടെ പട്ടിക അന്തിമമാക്കി ഗവർണർക്ക് കൈമാറാൻ വി.ഡി സതീശന് സാധിച്ചിരുന്നു. കോൺഗ്രസിൽ നിന്ന് മുഖ്യമന്ത്രി ഉൾപ്പെടെ 11 പേരും, മുസ്ലിം ലീഗിൽ നിന്ന് 5 പേരും, മറ്റ് ഘടകകക്ഷികളിലെ പ്രതിനിധികളും അടങ്ങുന്നതാണ് പുതിയ മന്ത്രിസഭ. സത്യപ്രതിജ്ഞാ ചടങ്ങുകൾക്ക് ശേഷം മന്ത്രിമാരുടെ വകുപ്പുകൾ സംബന്ധിച്ച ഔദ്യോഗിക വിജ്ഞാപനം പുറത്തിറങ്ങും.