ജൂണിൽ വമ്പൻ ഓഫർ പ്രളയം; ഉപഭോക്താക്കളെ ആകർഷിക്കാൻ ഹോണ്ട കാറുകൾക്ക് റെക്കോർഡ് വിലക്കിഴിവ്

പുതിയ കാർ വാങ്ങാൻ ആഗ്രഹിക്കുന്നവർക്ക് സുവർണ്ണാവസരമൊരുക്കി പ്രമുഖ വാഹന നിർമ്മാതാക്കളായ ഹോണ്ട കാർസ് ഇന്ത്യ. തങ്ങളുടെ ജനപ്രിയ മോഡലുകളായ ഹോണ്ട എലവേറ്റ്, ഹോണ്ട അമേസ്, ഹോണ്ട സിറ്റി എന്നിവയ്ക്ക് വൻ വിലക്കുറവുകളും ആകർഷകമായ ഓഫറുകളുമാണ് കമ്പനി പ്രഖ്യാപിച്ചിരിക്കുന്നത്. ക്യാഷ് ഡിസ്‌കൗണ്ടുകൾ, എക്സ്ചേഞ്ച് ബോണസുകൾ, ലോയൽറ്റി റിവാർഡുകൾ, പ്രത്യേക വാറന്റി ഓഫറുകൾ എന്നിവ അടങ്ങുന്ന ഈ ആനുകൂല്യങ്ങൾ ജൂൺ 30 വരെ മാത്രമായിരിക്കും ലഭ്യമാകുക. നഗരവും ഡീലർഷിപ്പും അനുസരിച്ച് ഓഫറുകളിൽ മാറ്റം വരാമെന്നും കമ്പനി അറിയിച്ചിട്ടുണ്ട്. ഇതിൽ ഏറ്റവും വലിയ ഓഫർ ലഭിക്കുന്നത് മിഡ്-സൈസ് എസ്‌യുവിയായ ഹോണ്ട എലവേറ്റിനാണ്. എലവേറ്റിന്റെ ZX MT, ZX CVT വേരിയന്റുകൾക്ക് 2.15 ലക്ഷം രൂപ വരെയുള്ള ആനുകൂല്യങ്ങൾക്ക് പുറമെ 360 ഡിഗ്രി ക്യാമറ, പ്രീമിയം ഡാഷ്ക്യാം എന്നിവയും ഉപഭോക്താക്കൾക്ക് തികച്ചും സൗജന്യമായി ലഭിക്കും. ക്രെറ്റ, സെൽറ്റോസ് എന്നിവയുമായി മത്സരിക്കുന്ന എലവേറ്റിന്റെ മറ്റ് വേരിയന്റുകളായ വി അപെക്‌സിന് 1.61 ലക്ഷവും, VX ട്രിമ്മിന് 1.53 ലക്ഷം രൂപയുടെയും ഓഫറുണ്ട്.

ഹോണ്ടയുടെ മറ്റ് മോഡലുകളായ അമേസിനും സിറ്റിക്കും മികച്ച ഡിസ്‌കൗണ്ടുകളാണ് ജൂൺ മാസത്തിൽ നൽകുന്നത്. കോംപാക്റ്റ് സെഡാനായ അമേസിന്റെ VX വേരിയന്റിന് 48,000 രൂപയും, വി വേരിയന്റിന് 28,000 രൂപയും ഉൾപ്പെടെ മൊത്തം 67,000 രൂപ വരെയുള്ള ആനുകൂല്യങ്ങൾ സ്വന്തമാക്കാം. കൂടാതെ ചില അമേസ് വകഭേദങ്ങൾക്ക് സിഎൻജി കിറ്റ് ഇൻസ്റ്റാളേഷനായി 20,000 രൂപ വരെ ഹോണ്ട റീഇംബേഴ്സ്മെന്റും വാഗ്ദാനം ചെയ്യുന്നു. ജനപ്രിയ സെഡാനായ ഹോണ്ട സിറ്റിയുടെ പെട്രോൾ പതിപ്പുകൾക്ക് 1.56 ലക്ഷം രൂപയുടെയും, സിറ്റി e:HEV ഹൈബ്രിഡ് മോഡലിന് 1.97 ലക്ഷം രൂപ വരെയുമാണ് വിലക്കുറവ് പ്രഖ്യാപിച്ചിരിക്കുന്നത്. കഴിഞ്ഞ മാസം വിപണിയിലെത്തിയ ഹോണ്ട സിറ്റിയുടെ അപ്‌ഡേറ്റഡ് മോഡലിന് നിലവിൽ വിപണിയിൽ വൻ ഡിമാൻഡാണ് രേഖപ്പെടുത്തുന്നത്. ഏപ്രിൽ മാസം വെറും 177 യൂണിറ്റുകൾ മാത്രം വിറ്റഴിഞ്ഞ സ്ഥാനത്ത് മെയ് മാസത്തിൽ 1,227 യൂണിറ്റുകളാണ് വിറ്റുപോയത്. ഒരു മാസം കൊണ്ട് വിൽപ്പനയിൽ 593.22 ശതമാനത്തിന്റെ റെക്കോർഡ് വളർച്ചയാണ് കമ്പനി കൈവരിച്ചത്.

ഡിസൈനിലും ഫീച്ചറുകളിലും വലിയ മാറ്റങ്ങളോടെയാണ് പുതിയ ഹോണ്ട സിറ്റി എത്തിയിരിക്കുന്നത്. പരിഷ്കരിച്ച മുൻഭാഗം, പുതിയ ബ്ലേഡ് ഐ ലൈറ്റിങ് സിസ്റ്റം, ഗ്രിൽ ലൈറ്റ് ബാർ, പുതിയ ബമ്പർ, എൽഇഡി ടെയിൽ ലാമ്പുകൾ, ആകർഷകമായ അലോയ് വീലുകൾ എന്നിവയാണ് പ്രധാന ബാഹ്യ മാറ്റങ്ങൾ. ഉള്ളിലേക്ക് വരുമ്പോൾ 10.1 ഇഞ്ച് ടച്ച്‌സ്‌ക്രീൻ ഇൻഫോടൈൻമെന്റ് സിസ്റ്റം, വയർലെസ് സ്മാർട്ട്‌ഫോൺ കണക്ടിവിറ്റി, വെന്റിലേറ്റഡ് ഫ്രണ്ട് സീറ്റുകൾ, 360 ഡിഗ്രി ക്യാമറ, ടൈപ്പ് സി ചാർജിങ് പോർട്ടുകൾ എന്നിവയും സജ്ജീകരിച്ചിരിക്കുന്നു. സുരക്ഷയുടെ കാര്യത്തിലും ഹോണ്ട വിട്ടുവീഴ്ച ചെയ്തിട്ടില്ല; അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റം, കൊളീഷൻ മിറ്റിഗേഷൻ ബ്രേക്കിംഗ്, ലെയ്ൻ കീപ്പ് അസിസ്റ്റ് തുടങ്ങിയ സുരക്ഷാ ക്രമീകരണങ്ങൾ വണ്ടിയിലുണ്ട്. പെട്രോൾ, ഹൈബ്രിഡ് ഓപ്ഷനുകളിൽ ലഭ്യമായ ഈ കാറുകൾക്ക് 12 ലക്ഷം മുതൽ 21 ലക്ഷം രൂപ വരെയാണ് വിപണിയിലെ വില വരുന്നത്.