ജയ ബച്ചൻ പാപ്പരാസികളോട് ദേഷ്യപ്പെടുന്നത് എന്തുകൊണ്ട്: വെളിപ്പെടുത്തി കരൺ ജോഹർ

ക്യാമറക്കണ്ണുകൾക്ക് മുന്നിൽ ദേഷ്യപ്പെടുന്നതിൻ്റെ പേരിൽ സോഷ്യൽ മീഡിയയിൽ പലപ്പോഴും വിമർശനങ്ങൾക്ക് ഇരയാകുന്ന ബോളിവുഡ് നടി ജയ ബച്ചനെ പിന്തുണച്ച് സംവിധായകൻ കരൺ ജോഹർ രംഗത്ത്.

പാപ്പരാസികളോട് ദേഷ്യപ്പെടുന്നതിലൂടെയാണ് ജയ ബച്ചൻ പലപ്പോഴും വൈറലാകാറുള്ളത്. എന്നാൽ, അഹമ്മദാബാദിൽ നടന്ന ഫിലിംഫെയർ അവാർഡ് ദാന ചടങ്ങിൽ വെച്ച് കരൺ ജോഹർ ജയ ബച്ചനെക്കുറിച്ച് ഒരു രഹസ്യം വെളിപ്പെടുത്തി, ദേഷ്യക്കാരിയുടെ പുറം തോടിനുള്ളിൽ അവർക്ക് ‘വളരെ ഊഷ്മളമായ’ (Very Warm) ഒരു ഹൃദയമുണ്ട്!

ഫിലിംഫെയർ അവാർഡ് വേദിയിൽ ജയ ബച്ചനെ ആദരിക്കുന്നതിനിടെയാണ് കരൺ ജോഹർ വികാരഭരിതനായത്. സ്വകാര്യ ഇടത്തേക്ക് കടന്നു കയറുന്നതിലാണ് തനിക്ക് ദേഷ്യമെന്ന് ജയ ബച്ചൻ പലപ്പോഴും വ്യക്തമാക്കിയിട്ടുണ്ട്. അടുത്തിടെ ഒരു ഫാഷൻ ഇവൻ്റിൽ വെച്ച് പാപ്പരാസികളുമായുള്ള തൻ്റെ പിരിമുറുക്കം അവർ തന്നെ തുറന്നു പറഞ്ഞു. “ഇതൊരു ചിട്ടയായ പരിപാടിയാകുമ്പോൾ, ഫോട്ടോ നൽകാൻ ഞാൻ തയ്യാറാണ്. പക്ഷേ, എൻ്റെ സ്വകാര്യ കാര്യങ്ങൾ നടക്കുമ്പോൾ, നിങ്ങൾ ഒളിഞ്ഞും തെളിഞ്ഞും ഫോട്ടോകൾ എടുക്കുന്നത് എനിക്ക് ഇഷ്ടമല്ല,” ജയ ബച്ചൻ പറഞ്ഞു.

കരൺ ജോഹർ തന്നെ സംവിധാനം ചെയ്ത ‘റോക്കി ഔർ റാണി കി പ്രേം കഹാനി’ (Rocky Aur Rani Kii Prem Kahaani) യിലാണ് അവർ അവസാനമായി അഭിനയിച്ചത്. രൺവീർ സിങ്ങിന്റെ മുത്തശ്ശിയായും രൺധാവ കുടുംബത്തിലെ ദേഷ്യക്കാരിയായ മാട്രിയാർക്കായും ഉള്ള അവരുടെ പ്രകടനം ശ്രദ്ധ നേടിയിരുന്നു. അടുത്തതായി വികാസ് ബാൽ സംവിധാനം ചെയ്ത് രമേശ് തൗറാനി നിർമ്മിക്കുന്ന ‘ദിൽ കാ ദർവാസ ഖോൽ ന ഡാർലിംഗ്’ (Dil Ka Darwaza Khol Na Darling) എന്ന റൊമാൻ്റിക് ഡ്രാമ ചിത്രത്തിൽ വാമിഖ ഗബ്ബി, സിദ്ധാന്ത് ചതുർവേദി എന്നിവർക്കൊപ്പം പ്രധാന വേഷത്തിൽ എത്താൻ ഒരുങ്ങുകയാണ്.