കോൺഗ്രസ് പാർട്ടിയിൽ ‘യെസ് ബോസ്’ സംസ്കാരമില്ലെന്നും പാർട്ടിയിൽ ആർക്കും തങ്ങളുടെ അഭിപ്രായങ്ങളും ആശങ്കകളും തുറന്നു പറയാനുള്ള സ്വാതന്ത്ര്യമുണ്ടെന്നും അത് തന്നെയാണ് കോൺഗ്രസിന്റെ ഭംഗിയെന്നും മന്ത്രി എം. ലിജു വ്യക്തമാക്കി. വിഴിഞ്ഞം ഓഹരി കൈമാറ്റ വിവാദത്തിൽ കോൺഗ്രസിനുള്ളിൽ ഭിന്നതയുണ്ടെന്ന ആരോപണങ്ങളോട് പ്രതികരിക്കുകയായിരുന്നു അദ്ദേഹം. സർക്കാർ നയങ്ങളുമായി ബന്ധപ്പെട്ട് ആർക്കും തങ്ങളുടെ ആശങ്കകൾ പങ്കുവെക്കാം. പിണറായി വിജയൻ പറയുന്നത് മാത്രമാണ് അവസാന വാക്ക് എന്ന് വിശ്വസിക്കുന്ന സിപിഐഎമ്മിനെ പോലുള്ള ഒരു പാർട്ടിയല്ല കോൺഗ്രസ്. ഇവിടെ ഏകഛത്രപതികളില്ലാത്തതിനാൽ പലവിധ അഭിപ്രായങ്ങൾ ഉയർന്നുവരുമെന്നും, മുഖ്യമന്ത്രി വി.ഡി. സതീശൻ ഉൾപ്പെടെയുള്ളവർ ആ ജനാധിപത്യ മര്യാദയെ അതേ സ്പിരിറ്റിലാണ് കാണുന്നതെന്നും ലിജു കൂട്ടിച്ചേർത്തു.
സംസ്ഥാനത്തെ മദ്യ നയത്തിലും കേരള ബാങ്ക് പുനഃസംഘടനയിലും നിർണായകമായ നിലപാടുകൾ മന്ത്രി പങ്കുവെച്ചു. വീര്യം കുറഞ്ഞ മദ്യം വിൽക്കണമോ എന്ന കാര്യത്തിൽ യു.ഡി.എഫ് മുന്നണി ചേർന്ന് ഉചിതമായ തീരുമാനമെടുക്കുമെന്നും, എന്നാൽ സംസ്ഥാനത്ത് മദ്യം വാങ്ങാനുള്ള കുറഞ്ഞ പ്രായപരിധി 23 വയസ്സായി തന്നെ കർശനമായി നിലനിർത്തുമെന്നും അദ്ദേഹം പറഞ്ഞു. പ്രായപരിധി പാലിക്കപ്പെടുന്നുണ്ടെന്ന് നിയമപരമായി ഉറപ്പുവരുത്തും. കൂടാതെ, കേരള ബാങ്കിന്റെ ഘടന മാറ്റുന്ന കാര്യത്തിൽ കൃത്യമായ പഠനത്തിന് ശേഷം മാത്രമേ നയപരമായ തീരുമാനമെടുക്കൂ. ജില്ലാ സഹകരണ ബാങ്കുകൾ പുനഃസ്ഥാപിക്കണമെന്ന ആവശ്യം ശക്തമാണ്. എന്നാൽ കേക്ക് മുറിക്കുന്നത് പോലെ എളുപ്പത്തിൽ ബാങ്കിനെ മുറിക്കാൻ കഴിയില്ലെന്നും, എടുക്കേണ്ട സമയത്ത് കൃത്യമായ തീരുമാനം ഉണ്ടാകുമെന്നും മന്ത്രി വ്യക്തമാക്കി.