ഓസ്‌ട്രേലിയക്കെതിരെ പെർത്തിൽ ഞായറാഴ്ച നടന്ന ഏകദിന പരമ്പരയിലെ ആദ്യ മത്സരത്തിൽ ഇന്ത്യ ഏഴ് വിക്കറ്റിന്റെ കനത്ത തോൽവി വഴങ്ങിയതോടെ, യുവനായകൻ ശുഭ്മാൻ ഗിൽ ഇന്ത്യൻ ക്രിക്കറ്റ് ചരിത്രത്തിൽ ഒരു ‘നാണക്കേടിന്റെ’ റെക്കോർഡിൽ ഇടം നേടി. ഏകദിന ക്യാപ്റ്റനെന്ന നിലയിൽ ഗില്ലിന്റെ അരങ്ങേറ്റമായിരുന്നു ഈ മത്സരം. വിരാട് കോഹ്‌ലിയുടെയും രോഹിത് ശർമയുടെയും തിരിച്ചുവരവ് കൊണ്ട് ശ്രദ്ധേയമായ ഈ കളി, ഇന്ത്യ ഈ വർഷം ഏകദിനത്തിൽ വഴങ്ങുന്ന ആദ്യ തോൽവി കൂടിയാണ്.
ക്യാപ്റ്റനെന്ന നിലയിൽ മൂന്ന് ഫോർമാറ്റിലും അരങ്ങേറ്റ മത്സരം തോൽക്കുന്ന രണ്ടാമത്തെ ഇന്ത്യൻ താരമാണ് ശുഭ്മാൻ ഗിൽ. നേരത്തെ വിരാട് കോഹ്ലിക്ക് മാത്രമാണ് ഈ റെക്കോർഡ് ഉണ്ടായിരുന്നത്. 2024-ൽ ടി20 ലോകകപ്പിന് ശേഷം സിംബാബ്‌വെയ്‌ക്കെതിരെ നടന്ന ആദ്യ ടി20 മത്സരത്തിൽ ക്യാപ്റ്റനായുള്ള ഗില്ലിന്റെ അരങ്ങേറ്റം 13 റൺസിന്റെ അപ്രതീക്ഷിത തോൽവിയിൽ കലാശിച്ചു.
രോഹിത് ശർമ ടെസ്റ്റ് ക്യാപ്റ്റൻസി ഒഴിഞ്ഞ ശേഷം ഈ വർഷം ആദ്യം ഇംഗ്ലണ്ടിനെതിരെ ഹെഡിംഗ്ലിയിൽ ഇന്ത്യയെ നയിച്ചപ്പോഴും പരാജയം തന്നെയായിരുന്നു ഫലം. ഞായറാഴ്ച ഓസ്‌ട്രേലിയക്കെതിരായ തോൽവി കൂടി ആയതോടെ ഗിൽ ഈ നാണക്കേടിന്റെ പട്ടിക പൂർത്തിയാക്കി.
കോഹ്‌ലിയുടെ സമാനമായ തുടക്കം
ഗില്ലിന് മുൻപ് ഈ റെക്കോർഡ് സ്വന്തമാക്കിയ വിരാട് കോഹ്‌ലിക്കും മൂന്ന് ഫോർമാറ്റിലും ക്യാപ്റ്റനെന്ന നിലയിൽ വിജയത്തോടെ തുടങ്ങാൻ സാധിച്ചിരുന്നില്ല.
ഏകദിനം: 2013 ജൂലൈയിൽ ഏകദിന ക്യാപ്റ്റനായുള്ള ആദ്യ മത്സരത്തിൽ ശ്രീലങ്കയോട് 161 റൺസിനാണ് ഇന്ത്യ തോറ്റത്.
ടെസ്റ്റ്: 2014-ൽ ഓസീസിനെതിരെ അഡ്‌ലെയ്‌ഡിൽ ടെസ്റ്റ് ക്യാപ്റ്റനായുള്ള അരങ്ങേറ്റവും 48 റൺസിന്റെ തോൽവിയിലായിരുന്നു.
ടി20: 2017 ജനുവരിയിൽ ഇംഗ്ലണ്ടിനെതിരെ നടന്ന ആദ്യ ടി20 മത്സരത്തിലും വിരാടിന്റെ ടീം ഏഴ് വിക്കറ്റിന് പരാജയപ്പെട്ടിരുന്നു.