സംസ്ഥാന പൊലീസ് സേനയുടെ ഘടനയിൽ വലിയ പരിഷ്ക്കാരങ്ങൾ കൊണ്ടുവരാൻ ആഭ്യന്തര വകുപ്പ് ഒരുങ്ങുന്നു. സ്റ്റേഷൻ ഹൗസ് ഓഫീസർമാർ (എസ്.എച്ച്.ഓ) മുതൽ മുകൾത്തട്ടിലുള്ള ഉന്നത ഉദ്യോഗസ്ഥർ വരെയുള്ള തസ്തികകളിലാണ് വലിയ അഴിച്ചുപണിക്ക് തുടക്കമിടുന്നത്. ഇതിന്റെ ഭാഗമായി സംസ്ഥാന പൊലീസ് മേധാവിയുടെ നേതൃത്വത്തിൽ ഇന്ന് ഉന്നതതല യോഗം ചേരും. പൊതുജനങ്ങൾക്ക് കൂടുതൽ സുതാര്യവും എളുപ്പത്തിലുമുള്ള സേവനങ്ങൾ ലഭ്യമാക്കുക, പൊലീസ് സ്റ്റേഷനുകളെ പൂർണ്ണമായും ജനസൗഹൃദ ‘സർവീസ് സെന്ററുകളായി’ മാറ്റുക എന്നിവയാണ് ഈ പുതിയ പരിഷ്ക്കാരത്തിലൂടെ ലക്ഷ്യമിടുന്നത്. ഒരു മാസത്തിനകം തന്നെ എസ്.എച്ച്.ഒ തലത്തിലുള്ള മാറ്റങ്ങൾ പൂർത്തിയാക്കി നടപ്പിലാക്കാനാണ് ആഭ്യന്തര വകുപ്പ് ലക്ഷ്യമിടുന്നത്.
സംസ്ഥാനത്ത് ലഹരി മാഫിയക്കെതിരെ വിജയകരമായി മുന്നേറുന്ന ‘ഓപ്പറേഷൻ തൂഫാൻ’ ക്യാമ്പയിൻ കൂടുതൽ ഊർജ്ജിതമാക്കാൻ പ്രത്യേക പൊലീസ് സംഘത്തെ രൂപീകരിക്കാനും ഇന്നത്തെ യോഗത്തിൽ തീരുമാനമാകും. ഈ വലിയ മാറ്റങ്ങളുടെയും നിർദ്ദേശങ്ങളുടെയും പശ്ചാത്തലത്തിൽ, നാളെ സംസ്ഥാനത്തെ മുഴുവൻ എസ്.എച്ച്.ഓമാരുമായും ആഭ്യന്തരമന്ത്രി രമേശ് ചെന്നിത്തല ഓൺലൈൻ വഴി നേരിട്ട് സംവദിക്കും. ജനസൗഹൃദപരമായ സമീപനത്തിലൂടെയും വേഗത്തിലുള്ള പരാതി പരിഹാരത്തിലൂടെയും നിയമപാലനം കൂടുതൽ ജനങ്ങളിലേക്ക് എത്തിക്കാനുള്ള അതിവേഗ നീക്കങ്ങളിലാണ് ഇപ്പോൾ സർക്കാർ.